19 Mar 2020

Banni ba Hukuntsi kwa kgaolong ya Kgalagadi ba lebogetse bagolwane ba kokelo e potlana kwa motseng oo go ba tlhagisa ka segajajaja  sa COVID-19.

Mothusa kgosi wa Hukuntsi, Kgosi Molaodi Leipego, a re badiri ba botsogo ga ba ise ba ipone tsapa go ruta morafe ka bodiphatsa jwa bolwetse jo le ka fa ba ka itshireletsang ka teng.

O ne a gwetlha badiri go tswelela ka go ralala kgaolo, segolo bogolo kwa metseng e e kgakala le ditlamelo.

O ne a kopa banni go tshwaragana le puso ka go obamela ditaelo gore maiteko a go thibela bolwetse a seka a folotsa.

Kgosi Leipego o ne gape a kgothatsa dikereke go tswelela ka go rapela gore seemo se fele ka jaana kanamo ya bolwetse jo e ka tsisa ditlamorago tse di maswe jaaka go phutlhamisa itsholelo.

Fa a tswa la gagwe, mooki, Rre Phillip Kobue, o ne a tlhalosetsa morafe fa bolwetse jo e le jwa losika lwa mohikela.

Bo simologile kwa lefatsheng la China ngogola ka kgwedi ya Sedimonthole, mme bo tsweletse ka go anama lefatshe ka bophara.

Rre Kobue a re ka lesego bolwetse jo, ga bo ise bo tlhagoge mo lefatshe leno le ntswa bo setse bo tsene kwa mafatsheng aa mabapi a Aferika Borwa le Namibia.

A re lefatshe leno le eme sentle go thibela kanamo ya bolwetse joo, a supa fa puso e tsere tshwetso ya go emisa ditirelo dingwe tse di ka nnang botlhabetsi jaaka go tswalwa ga melelwane mengwe, mme a supa fa go sa neelwa tshwene marapo, ka jaana go tlhomilwe a lekana la botsogo kwa melelwaneng mengwe go tlhatlhoba botlhe ba ba tsenang mo lefatsheng leno.

Rre Kobue a re go sikilwe mafelo a a faphegileng fa go ka tshogana go nna le bangwe ba ba ka supang dikai tsa bolwetse jo.

A re dikai tsa bolwetse jwa COVID-19 ke mogote o o kwa godimo, go gotlhola, go hema ka bothata, letsapa le le feteletseng le gone go opiwa ke tlhogo, mme a re yo o ka bonang dikai tseo, a ikgolaganye le ba botsogo ka bofefo.

Rre Kobue o ne a gwetlha banni go rotloetsa bophepa ka go tlhapa diatla ka molora, go fokotsa mesepele kwa mafelong a amegileng le gone go fokotsa go kgobokana ka dipalo tse di fetang masome a matlhano.

O ne a ba tsibosa fa ngwao e tsile go amiwa ke mengwe ya melao ya itshireletso jaaka go apaya kwa dintshong le gone go dumedisana ka diatla, ka jalo a ba gwetlha go amogela seemo go fitlhelela seemo sa bolwetse se kokobela.

Mogolwane wa botsogo, Rre Bagogi Chibona, o ne a tlhalosa fa COVID-19 e sa tsamae ka phefo, mme bo anama ka dieledi. O tlhalositse fa bo ka tsena yo mongwe ka go ethimola motho a sa thiba molomo kana nko le fa motho a ka amana le didirisiwa kgotsa diatla tse di kgotlelesegileng.

Mo go tse dingwe, Rre Chibona o ne a gwetlha setshaba go nna podi matseba gore ba amogela dikgang tsa mohuta ofe ka kanamo ya bolwetse jo, a supa fa ba lemoga gore metswedi mengwe ya dikgang e gatisa dikgang tse di senang boammaruri.

O ne a ba gwetlha go reetsa dikitsiso tse di tlhomamisitsweng go tswa kwa lephateng la botsogo tse di begiwang mo thelebishining ya setshaba, pampiri ya dikgang ya DailyNews le seromamowa sa Botswana. Bokhutlo