15 Mar 2020

Mapodisi a Mahalapye a gakolotse setshaba go kopa thuso le bogakolodi mo bagolong le dikgosi go rarabolola matshwenyego a bone.

Superintendent Boitshepo Modongo o boletse mo potsolotsong fa ba tshwenngwa ke dikgang tsa dipolaano le go ikgapela matshelo.

A re mo Mahalapye ba ne ba begelwa fa go na le monko o o utlwalang go tswa mo ntlong nngwe mme go belaelwa fa mongwe a ka tswa a tlhokafaletse moo.

Morago ga pego eo, Supt Modongo a re ba ne ba ya kwa ntlong eo kwa Xhosa 1, mme ba fithela rre wa dingwaga tse di masome a mabedi le boraro, yo o tlholegang kwa Mokoswana, a akgega mo marulelong a ntlo.

O tlhalositse fa ba fitlhetse moswi a akgega mme a bofeletswe matsogo ka ko pele, ka jalo ba ne ba tshwanelwa ke go letela ngaka go tlhatlhoba mmele ka o ne o setse o senyegile thata.

A re ba ne ba tlhoka go dira ditlhotlhomiso tsa potlako ka jaana go ne go sa kaege sentle fa motho yoo a ne a ipolaile kgotsa a bolailwe.

Supt Modongo o ne a kaya fa ba ne ba nna le ditiego ka ba ne ba tshwanelwa ke go leta moitseanape mogolo go tswa kwa Francistown.

Fa a sena go tlhatlhoba mmele oo, moitseanape o ne a kaya fa go supega fa rre yoo a sa bolawa, mme e le ene a ipofileng matsogo pele ga a ikgapela botshelo.

Supt Modongo a re morago ga ditlhatlhobo, batsadi ba ne ba fiwa tetla ya go boloka ka potlako.

O kaile gape fa moswi yo o neng a direla mo khamphaneng nngwe kwa Shoshong, a tlogetse mokwalo go laela masika.

A re moswi o sale a tsamaya a le mo malatsing a gagwe a boikhutso kwa tirong.

O tlhalositse fa tiragalo e, e le ya botlhano go gatisiwa, go simolola ka Hirikgong.

Mo go tse dingwe, Supt Modongo a re ba tshwenngwa ke go thubiwa ga matlo bogolo jang kwa Boseja/Flowertown le go epololwa ga megala ya motlakase.

O boletse fa bogodu jwa leruo le jone bo tshwenya bogolo jang jwa dipodi. Bokhutlo