15 Mar 2020

Moeteledipele wa mokgatlho wa Glory Charity, Rre Bathuseng Gabatshele, o kgothaditse baithuti ba sekolo sa Mokani kwa Letlhakane go nna le toro ya gore ba batla go dira eng mo botshelong.

Rre Gabatshele o buile jalo fa a ile go kgothatsa baithuti ba lekwalo la bosupa kwa sekolong seo bosheng.

A re gore motho a fitlhelele toro ya gagwe, o tshwanetse go bereka ka natla mo dithutong tsa gagwe.

O ne gape a gakolola gore baithuti ba tlhophe ditsala tse di siameng.

Rre Gabatshele a re motho yo o nang le tebelopele ga a kake a latlhegelwa ke kelelelo e bile ga a fekeetswe ke mekgwa ya balekane.

A re fa motho a na le maikaelelo o ka fetola botshelo jwa gagwe ka thuto, a tlatsa ka gore dikgwetlho tsa botshelo ga di a tshwanela go ba kgoba marapo.

O ne gape a re gore motho a atlege mo botshelong, o tshwanetse go sala morago toro le maitlamo a gagwe le fa go ka nna thata jang.

Rre Gabatshele a re motho o tlhoka Modimo mo botshelong jwa gagwe.

Morutabana Mme Thato Kesentseng ene o ne a kopa baithuti go tsaya dikgakololo ka tlhwaafalo ka jaana di ka fetola matshelo a bone.

Mme Kesentseng o ne a ba rotloetsa go reetsa ka dikgakololo tse di le  botlhokwa e bile di ka ba kgontsha gore ba tokafatse maduo a bone.

Mongwe wa baithuti, Loago Chapete, a re dithuto tse ba di filweng di botlhokwa e bile ba ithutile go le gontsi.

Loago a re ba tshwanetse go nitama mo tirong ya bone ya sekole gore ba tle ba fenye mo dithutong tsa bone. Bokhutlo