08 Mar 2020

Ntlo lehalahala ya Middlepits e ne e tletse e rile thii! bosheng, fa badiragatsi ba ne ba iteisanya borathana mo dikgaisanyong tse di mashetla tsa kgaolo ya Kgalagadi Borwa, go itlhokoletsa dikgaisanyo tsa malatsi a ga Tautona.

Dikgaisanyo tseo, tse e leng pulamadibogo ya dikgaisanyo tsa ga Tautona, di ne di rulagantswe ke ba lephata la Tlhabololo Banana Metshameko le Ngwao.

Di ne di tshologetswe ke badiragatsi ba bagologolo le ba basha, ba ntsha ga tshwene mo seraleng, go ipatlela phatlha mo dikgaisanyong tsa malatsi a ga Tautona tse di tlaa tshwarwang ka Phukwi.

Babogedi ba ne ba akola lobebe lwa ngwao, fa badiragatsi ba ne ba phadisanya ka go tshameka segaba, setinkane, go letsa katara, poko, dikhwaere, go bina Polka, Namastaap le gone go diragatsa ka go supa motshameko.

Moepolodi wa tsa ngwao mo Tsabong, go tswa mo lephateng la Tlhabololo Banana Metshameko le Ngwao, Mme Keabetswe Motswasele a re dikgaisanyo tseo ke tsa bobedi go tshwarwa mo kgaolong ka ngwaga wa madi wa 2019/2020.

A re dikgaisanyo tseo di gola ngwaga le ngwaga, mme e bile monongwaga ba itemogetse kgolo ka gore di ne di tshologetswe ke matshwititshwiti a batho, mme e bile di ne di le mashetla fa di tshwantshanngwa le dingwaga tse di fetileng.

Dikgaisanyo tseo di simologile ka 2010 go ribolola talente mo go tsa mmino le ngwao.

Maikaelelo a puso ke go ntsha banana mo mekgwatheng, bogolo jang, ba ba sa berekeng gore ba nne le sengwe se ba ka se dirang le go itshetsa.

Mme Motswasele a re metshameko eo, ga e tlhaole ka e akaretsa bagolo ba ba nang le talente ya diletso tsa Setswana jaaka segaba le setinkane, tse banana ba ka anywang sengwe, ka letlhaku le lesha le agelwa mo go le legologolo, mme e bile dilo makwati di kwatabolotswa mo go ba bangwe.

A re legato la ntlha la dikgaisanyo tseo le ne le tshwaretswe kwa kgotleng ya Tsabong ngogola, mme gompieno boleng jwa badiragatsi bo itshupa fa bo tokafetse.

“Gompieno kgaisanyo e fa godimonyana, badiragatsi ba ntse ba a itlhokotsa gore ba nne le sebaka sa go tsenelela dikgaisanyo tse ditona.”

A re dikgaisanyo tse dipotlana di direletswe go thusa badiragatsi go baakanya diphoso gore ba tsene ba kanotse dihuba mo dikgaisanyong tsa malatsi a ga Tautona.

O supile fa go tshwara dikgaisanyo tseo go le botlhokwa ka gore ditlhopha tsa badiragatsi di kgonne go gatisa moopelo, mme e bile bangwe ba bidiwa go tla go tsaya karolo mo manyalong le mo medirong, selo se a reng se supa kgolo.

A re ditlhopha di kgona go itirela le tseno. “Bontsi jwa bone ba ne ba sena matlole kwa dipolokelong, mme ba kgonne go a bula.

Jaanong ba tsamaisa ditlhopha tsa bone e le kgwebo, ga e sa tlhole e le bodiragatsi jole jwa bogologolo,” a tlhalosa.

Mookamela kgaolo ya Kgalagadi go tswa kwa lephateng leo, Mme Betty Gaotilwe a re Botswana o humile badiragatsi.

Bogologolo bodiragatsi bo ne bo sa tsewe tsia ka bo ne bo beilwe ka kwa segotlong, go dumelwa gore mebereko ke ya ba ba iteilweng seatla fela.

O tlhalosa gore bodiratsi jone ke neo e motho a tsalwang ka yone, ka jalo ga se mang le mang yo o nang le yone.

A Botswana o humile dingwao tse di farologanyeng, mme bodiragatsi bo ka tsisa popagano gareng ga setshaba, ka jalo go botlhokwa go somarela ngwao gore dikokomane tse di tlaa tlang kwa morago di bone gore Batswana ba ne ba supiwa ka eng.

Monana wa mmoki, Botshelo Motlhanke go tswa mo Tsabong o ne a supa fa a sena molekane fa a itlhoma kwa pele mo pokong, fa Samanyane Kudume ene a ikgapetse maemo a ntlha mo go tshamekeng segaba.

Maiteko Ntswakge o ne a itlhoma kwa pele mo go tshamekeng setinkane.

Maemo a ntlha a katara a ne a tsewa ke Nkopo Ditshoso fa khwaere ya Tsoga Maroko e ne ya gapa maemo a ntlha.

Setlhopha sa Trek ‘E’ Ding Polka Group go tswa Vaalhoek, sone se ikgapetse maemo a ntlha mo mminong wa Polka fa Seboana Theater Group bone ba ne ba sena yo ba iteisanyang borathana nabo, mme ba ikgapela maemo a ntlha. Bokhutlo