09 Feb 2020

Kgosi Monnawatala Kgagodi wa Kgagodi  o supile fa   bogodu jwa loruo  bo ile magoletsa kwa motseng oo, selo se a reng se tsentse tlhobaelo mo baruing.

Kgosi Kgagodi o buile jaana kwa phuthegong ya kgotla e e neng e buisiwa ke mopalamente wa Mmadinare Rre Molebatsi Molebatsi bosheng.

O tlhalositse fa go utswiwa ga leruo le tshwana le ditonki, dipodi le dikgomo go dirwa ke banana, a re barui  ba Kgagodi ba setse ba dule batlhoki  ka magodu a ba amogile  di tsa bone.

 Kgosi a re bogodu bo rotloediwa ke batsadi ba ba bipang mpa ka mabele le ntswa ba bona ditiro tse di maswe tse di dirwang ke bana.

A re magotswana ao, a setse a latela leruo le tshwana le dipodi mo masakeng, mme a kopa puso go gagamatsa dikatlholo tsa bogodu jwa loruo.

Mo go tse dingwe, kgosi o ne a supa fa a tshwenngwa ke go tlhoka go tsena diphuthego ga banana ba Kgagodi, a re  bagolo ke  bone ba  ba santseng ba ya kwa kgotleng ntswa bontsi jwa bone  ba sa tlhole ba kgona ka lebaka la bogodi.

A re se, se a tshwenya ka merero yotlhe ya tsamaiso  lefatshe e direlwa kwa dikgotleng.

O supile fa se se diga serodumo se dikgotla di kileng tsa bo di  itsege ka sone.

Mo mafokong a gagwe, Rre Molebatsi o  supile  fa kabo ya madi a setshaba e e sa tswang go feta e  tsle go araba matshwenyego a Batswana ba ntseng ba lela ka one, a tshwana le letlhoko la boroko jwa barutabana, melemo kwa dikokelong le  tse dingwe.

E rile a akgela mo mafokong a ga Kgosi, Rre Molebatsi o ne  a kgala mokgwa o o maswe wa batho ba ba tsweletseng ka go amoga batho di  tsa bone, mme a supa fa puso e tsentse leitlho thata mo dikgannyeng tsa go nna jalo.

Rre Molebatsi o kopile setshaba go thusana le mapodisi go bega dikgang tsa bogodu ka ba ka seke ba kgone ba le nosi.

Mo go tse dingwe, Rre Molebatsi o supile fa palamente ya gompieno e le pharologanyo ka e tletse ka banana ba ba nang le dithuto  tse di  ka tlhabololang lefatshe le batho ba lone mme ba ikaegile ka tebelopele ya setshaba ya 2036.

A re puso e setse e simolotse go tlhoboga di-tswa mmung ka e sa laole theko le ditlhwatlhwa tsa tsone, ka jalo ba tshwanetse go tswa ka megopolo e mesha  e e ka reng mo isagong ya tsenyetsa lefatshe madi.

E rile ba akgela mo mafokong a ga mopalamente, mongwe wa bagolo Rre Tshwaraganang Kepaletswe a supa fa ba lephata la kabo ditsha ba  ise  ba ba neele ditlankana tse disha morago ga  go  potielwa ga ditsha.

Monni yo mongwe, Rre Kereng Koko o ne a supa fa lefatshe la Botswana le tlaa tswelela le nna le dipalo tse di kwa godimo tsa bana ba ba sa berekeng fa le sa fetole tsamaiso ya thuto.

A re go tshwanetse ga lebelelwa se ngwana a se kgonang mme go itebaganngwe le sone ka e le sone se se ka tsogang se mo jesa.

Kwa bofelong mokhanselara wa Kgagodi/Diloro Rre Thabo Keosentse  o supile fa tiro ya go baakanya kokelo ya Maokatuma e ne ya tswa ka kgwedi ya Sedimonthole  ngogola, mme  go ne ga lemotshega fa go nnile le tsamaiso e e sokameng fa e ajwa.

Rre Koosentse a re seo ke sone se se diileng tiro  go simolola, mme a rotloetsa ba ba maleba go ikgapha mo tshenyetsong setshaba ka e dia ditiro tsa puso go tswelela. BOKHUTLO