22 Jan 2020

Mopalamente wa Kanye Bokone, Rre Thapelo Letsholo, o tlhaloseditse banni ba Moshana gore kokelo ya Kanye e tsentswe mo ditogamaanong tsa ditlhabololo.

Rre Letsholo o buile jalo mo phuthegong ya kgotla ka Mosupologo.

O tlhalositse fa tona wa Botsogo le Boitekanelo Dr Lemogang Kwape a supile fa kokelo eo e tsentswe mo lenaneong la ditlhabololo la ngwaga oo simologang ebile a e kopetse madi.

Mopalamente a re kgaolo e tswa kgakala e thusiwa ke kokelo ya kereke ya Sabata, selo se a reng ba a se lebogela.

Mme a re go lemosegile gore ga go a lekana ka jaana dipalo di godile.

A re go utlwala gape fa kokelo eo jaanong e le mo dithulaganyong tsa go ikemela, selo se a reng se ka tla go turela banni ka jalo go tlhokafala kokelo ya puso.

Gape o ba lekodisitse fa tona wa tlhabololo banana, metshameko le ngwao, Rre Tumiso Rakgare a emetse go bontshiwa fa lebala la metshameko le ka agwang teng kwa Kanye.

A re mo nakong ya gompieno, go na le mafelo a le mabedi a go akanyediwang gore lebala leo le ka agiwa mo go one.

Mo go tse dingwe,     Rre Letsholo o supile fa a eletsa go kopana le bagogi ba khamphane ee epang konkoreiti kwa kwaring ya Moshana.

A re khamphane eo e a thusa, mme ga go a lekana a ba a supa fa tona wa Meepo, Kgotetso le Kgopo ya Metsi aa Leswe Rre Kefentse Mzwinila a solofeditse go etela motse oo.

Fa a ba lekodisa ka dikgang tsa Palamente, Rre Letsholo o boletse fa a ntshitse mogopolo wa gore ditiro tsa puso tsa madi a a sa feteng P10 million di neelwe Batswana.

Gape o supile fa a beile Palamente pele mogopolo wa gore puso e re e reka dithoto kwa ntle e bo e dira gore Batswana ke bone ba di ise kwa di tshwanetseng go ya teng.

A re o lemogile gore go le gantsi batswakwa ke bone ba felelang ba akola.     

Rre Letsholo o ne a tlhalosa fa a itlamile go direla kgaolo ya gagwe ka bojotlhe le boineelo.

A re morongwa wa setshaba ga a tshwanela go nna marota bogolo jang mo go ba ba mo romileng.

Mme o tlhalositse fa a ka kgona thomo fela fa ba ka tshwaragana le ene ka Motswana a re setshwarwa ke ntsa pedi ga se thata.

O supile gape fa a eletsa go kopana le baeteledipele ba kgaolo ba pele go supa tlotlo le go ba lebogela seabe sa bone.

A re go botlhokwa go tlotla motho a santse a le mo botshelong.

Fa a ntsha la gagwe, Kgosi Seate Marumo o ne a ikuela mo go mopalamente ka letamo la Polaamotho le a reng le ba feleditse leruo.

A re dikgomo tsa bone di tshwarwa ke seretse mo letamong leo mme a kopa gore le akanyediwe gore le ka tokafadiwa jang.

Kgosi Marumo gape o ikuetse ka setlhare sa mokgwapha se se anameng mo motseng wa gagwe.

A re go na le makgowa a a neng a jwala mokgwapha mo motseng o o jaanong o le gongwe le gongwe mo o kgoreletsang peo ya ditsha.

Kgosi o ikuetse ka mafuti aa tlogetsweng ke bangwe baba kileng ba epa ditswammung koo.

A re ba tswa kgakala ba lela ka mafuti aa epilweng ka jaana a le borai mo go bone.

Modulasetilo wa ditlhabolo tsa motse, Rre Wapula Kealeboganyana, o ne a lebogela kago ya diofisi tsa mapodisi, dipone tse di tsentsweng mo kgotleng le ntlo ya boipelego.

Rre Kealeboganyana a re go na le ntlo ya sekole sa bananyana a re mathata ke gore ga e bereke mme a kopa gore e busediwe mo tirisong ka jaana ebile bangwe ba setse ba e thubile difensetere.

O ne a kopa dipone tsa mo mekgwatlheng le kwa sekoleng a tlhalosa fa lefifi le oka dirukutlhi.

Gape a re baoki ba nna kgakala le tiro selo se a reng se ba kgoreletsa go dira tiro ka bojotlhe. BOKHUTLO