21 Jan 2020

 Banni ba kgotla ya Malete kwa Tumasera ba tlhomile kgosana ya kgotla ya bone morago ga gore mogolowe yo o neng a le mo maemong ao a tlhatlosiwe maemo go ya kwa kgotleng e tona.
Kgosana e e neng e tlhomiwa ke Rre Tathego Gaothobogwe.

E ne yare a ba ema ka lefoko mopalamente wa kgaolo ya Sefhare/Ramokganami, Dr Kesitegile Gobotswang a supa fa seabe sa bogosi mo pusong ya batho ka batho se tseelwa kwa godimo.

A re kgotla ke makgatlhanela thapong ka merero yotllhe e e siamemg le e maswe e rerelwe mo go yone.

Mopalamente o supile fa a ema dikgang tsa bogosi nokeng ebile a na le keletso ya go bona bo neelwana ka kagiso jaaka go diragetse kwa kgotlaneng ya Malete.

Dr Gobotswang a re kgosi thothobolo e olela matlakala, seo se raya gore o ya go di bona tsotlhe mme fa a tsaya ditshwetso a seka a soka dirope.

A re sepolotiki se seka sa tsena mo kgotleng go sireletse ledula.

Borangwane, malome, rakgadi le marara a dikgotla tse dingwe ba ne ba re tiro ya bogosi ke morero le ba ba maleba, gape kgosi ga a je gongwe le gongwe o tshwanelwe ke gonna le mogopo o o molebaneng.

Kgosana ya kgotla e tona ya Tumasera, e e okametseng dikgotla tse nne tse dibopang Tumasera, Kgosi Kelapile Maleele o kaile fa kgosi e le thata ka borangwane le dikgosana tsa di kgotla tse dingwe ka o ka anya go le gontsi mo go bone.

Kgosi Maleele a re morero le tirisano mmogo ke tsone seikokotlelo sa gagwe, se se ka mo kgontshang go dira tiro ka manontlhotlho le tolamo.

O kopile morafe go tlotla kgosi ya bone le go dirisana nae sentle.

Mothusa kgosi kwa kgotleng e tona, Rre Letlhogonolo Gaothobogwe a re o diretse morafe wa kgotlana ya Malete dingwaga di le 13 years mme o kgonne seo ka therisano le borangwanaagwe le morafe, dikgakololo tsa bone e ne e le tse di agang e seng tse di thubang mme ke sone se a neng a tlhatlosiwa maemo .

Dibui di gakolotse kgosi go ila tshenyetso setshaba ka go gana pipa molomo mo tirong.

Fa atswa la gagwe kgosana, Rre Gaothobogwe o lebogile mopalamente, dikgosi, borangwanaagwe, dikgosi, botsadi le morafe go mo neela bogosi ka fa molaong a re ke yone tsamaiso e e maleba.

Rre Gaothobogwe o dirile mo meepong e e farologaneng ya lefatshe leno, ke motshameki wa kgwele ya dinao gape ke seopedi sa mmino wa disco.

Kgoasana Gaothobogwe o solofeditse go solegela banni ba motse wa gagwe mosola ba bontsi e leng banana a re o tlhaloganye botoka tse banana ba ditlhokang le tse ba eletsang go di dira a re o solofela tirisano mmogo e ntle le bone. BOKHUTLO