21 Jan 2020

Kgosikgolo wa Bangwaketse, Kgosi Malope II, o gakolotse morafe go ipha nako ya go tsamaisa dipatlo tsa manyalo.

O buile se kwa phuthegong ya kgotla kwa Kanye bosheng.

A re o itse ka ngongorego ya morafe mabapi le dipatlo tse di tshwarwang  morago ga go supa dikgomo kwa kgotleng.

Banni ba re ba patelesega go batla motshegare.

Kgosi Malope a re ga go patelesege gore go tshwarwe patlo fela morago fa dikgomo di sena go supiwa kwa kgotleng.

A re beng ba lenyalo ba ka buisanya gore a ba ka dira patlo mo tshokologong kana ba batle ka letsatsi le lengwe.

Kgosikgolo  a re se se botlhokwa ke go kwadisa dikgomo kwa kgotleng.

E rile a bua ka dintsho, Kgosi Malope a supa matshwenyego ka diphitlho tse di diegang, mme a kopa morafe go itlwaetsa go somarela nako.

“Batho ba tshaba go re fitlha ba re kwa Kanye go tlholwa mo phitlhong” Kgosi Malope a tlatsa.

O gakolotse morafe go dirisa letsatsi la segopotso sa moswi go letla dibui ka bontsi go bua go fokotsa tiro ka letsatsi la phitlho.

Mo dikgannyeng tse dingwe, Kgosi Malope a re o tshwenngwa ke dikgang tsa bogodu le dipolaano.

O ne a kopa batsadi go kgalemela bana ba bone ka maikaelelo a go tokafatsa seemo.

Ntswa morafe o ikuetse gore moretlwa o lele mo baneng ba ba senang tsebe, Kgosi Malope o tlhalositse fa le bone e le magosi ba eletsa jalo mme molao o ba baya ka fa mosing ka o sa letlelele thupa ya mokwatla.

Fa a tswa la gagwe, kgosana wa goorra Morupi, Rre Mpho Kenosi  a re o tshwenngwa ke seemo se e reng fa motho wa mme a sa nyalwa e be go tla gore bana ba gagwe ba e leng ditlogolo ba ithekolole ba ntshetse motsadi wa bone magadi.

A re golo moo go tsile go felela go tsosa dikgotlhang ka jalo a kopa kgosikgolo gore ntlha e ba e tsenye leitlho.

Kgosi wa Mmathethe, Rre Daniel Mathiba, a re kgang ya gore ditlogolo di ithekolole e goroga bosheng mme e bile e tshwanetse go tsibogelwa.

Kgosi Mathiba a re o itse gore ngwana o ntshediwa bogadi ke rraagwe a mo tsaya fa a sa nyala mmaagwe.

A re fa mmangwana a nyalwa go iwa kwa go rraagwe a ye go bodiwa gore a o tsaya ngwana kana a rebole mma ngwana a tsamaye le ene kwa lenyalong le a tsenang mo go lone.

Mothusa kgosikgolo, Rre Kebapetse Telekelo, a re lefoko la la go ithekolola le tla gompieno, a re bogologolo ba ne ba itse gore bana ba apesa mmaabone tjale, ba dira jalo ba latlheletse bomalomaagwe sengwe mme e seng bogadi gore e re fa go tshwerwe ditiro mmaabo a seka a kgaphelwa ntle.

Mme Serame o ne a bua gore go simololwe ko botsading ka ke jone pitsana ya ditagi, bana ba tshola mo go bone. BOKHUTLO