12 Nov 2019

Mapodisi a tshwere banna ba le bane ba go belaelwang e le bontlha bongwe jwa digongwana tse di ntseng di tlhorontsha ka go thuba le go utswa dithoto mo dikgaolong tsa Kweneng, Kgatleng le Legare.

Mookamela mapodisi a kgaolo ya Kweneng, Senior Superintendent Modise Gabatshwane o boletse mo potsolotsong fa babelaelwa ba le babedi ba santse ba ineile naga.

Rre Gabatshwane o tlhalositse fa e ne ya re bosheng, babelaelwa bao, ba ba dingwaga tse di fa gare ga 22 le 32, ba ralala mafelo a le mantsi a kgaolo ya Kweneng ba thuba, mme ba utswa dithoto tsa madi a a ka tshwarang P100 000 mo marekisetsong a bojalwa le mo malwapeng.

O tlhalositse fa dingwe tsa dithoto tse di bonweng di akaretsa didirisiwa tsa motlakase jaaka shage ya nama, setsidifatsi, disupaditshwantsho tse thataro, majalwa a sekgowa a a farologanyeng le dijo magareng ga tse dingwe.

Rre Gabatshwane a re ditlhotlhomiso tsa mapodisi di supa fa banna bao ba dirisa metlhala e le mentsi go senya ka jaana ba fitlhetswe ka didirisiwa di akaretsa diatlana le ditshipi tse di robang mabati le difensetere.

Go tlhalosiwa fa banna bao ba dirisa dikoloi tsa modiro wa Honda Fit di le pedi go ya go tse tharo tse go belaelwang ba ne ba di hirisitse, mme ba sale ba inaya naga morago ga go fetisa lebaka la tumalano e e neng e dirilwe. 

Ramapodisi o ne a tswelela a supa matshwenyego a kgolo ya dikgang tse a tlhalositseng di rotloediwa ke batho ba ba rekang dithoto tsa bogodu, bangwe ba bone e le bagwebi ba marekisetso a bojalwa. 

A re se se rotloetsa tshenyo ka bao ba ba senyang ba itse fa gona le bareki. BOKHUTLO