07 Nov 2019

Badiri ba lephata la Buildings and Engineering Services (DBES) kwa Tsabong  ba supile mowa wa kutlwelobotlhoko le lorato ka go agela motlhoki mongwe ntlo kwa Maubelo.

Fa a bua kwa kabong semmuso ya ntlo eo, mogolwane go tswa kwa lephateng leo, Rre Motsumi Kganyako o tlhalositse fa ba ne ba simolodisa kago ya ntlo ka 2017 morago ga go lemoga letlhoko la ga  Mme Semakaleng Mmereki.

Mme Mmereki o ne a dirile maiteko a go aga ntlo eo, mme a tlhaelela mo tseleng, ka jalo ba mo tswa thuso  ka ‘mokoduwe go tsosiwa oo itekang’. 

 Rre Kganyako o ne a tlhalosa fa ba ne ba thulanya ditlhogo, mme  ba tshwaragana le ba boipelego go dira  tshekatsheko ya bone.

A re ba ne ba kokoanya  madi a a kanang ka P30 000 le go dira ka diatla go feleletsa ntlo eo, le go teratelela segotlo.

Rre Kganyako a re ba ne ba ikuela mo diofising tse dingwe, maphata a a farologanyeng a puso, dikompone le setshaba ka kakaretso ba ba thusitseng ka madi.

A re ba Botswana Power Corporation ba ne ba tsenya ntlo motlakase, fa ba FurnMart ba thusitse ka bolao, mme ba DBES ba ne gape ba rekela lolwapa leo dijo tsa P450.

Fa a aba ntlo eo, mothusa mookamedi wa lephata la dikago le tlhabololo matlo go tswa Gaborone, Mme Magdeline Ndlovu o ne a galaletsa lephata la gagwe ka tiro e ntle eo.

A re ba  na le mowa wa go aba e bile ba dira ka lorato go thusa ba ba tlhokileng lesego mo botshelong, selo se a reng se tlaa tlotlomatsa lephata leo.

Mme Ndlovu o ne a kopa Mme Mmereki go tlhokomela ntlo eo thata, ka e ka mo solegela molemo fa e ka tsaya nako e ntsi e le mo seemong se se siameng, e bile se eletsega.

Mogolwane go tswa kwa khanseleng ya Kgalagadi, Rre Patrick Keongadile o ne a popotha badiri ba DBES legetla ka go gopola ba ba kobo dikhutshwane, a ba a rotloetsa maphata a mangwe a puso go tsaya malebela mo go bone.

O ba kgothaditse le gone go leba le kwa ntle, bogolo jang kwa metseng e e kgakala thata  le ditlamelo, ka go na le ba ba tlhokang ba le bantsi teng.

Mme Mmereki o ne a phophoma ka boitumelo go amogela ntlo eo, a supa fa e le thato ya Modimo gore monwana o bo o supile ene.

O ne a re le ene o ikutlwa a na le seriti ka a na le bonno jo bo siameng kwa a ka latsang tlhogo teng, ka gore pele o ne a latsa tlhogo mo matlong a Setswana a a onetseng.

Mme Mmereki o ne a eleletsa badiri ba lephata la DBES masego le matlhogonolo le tswelelopele mo ditirong tsa bone. BOKHUTLO