07 Oct 2019

Mothusa kgosi kwa Letlhakane, Kgosi  Tikologo Supang, o rotloeditse  komiti ya liki ya kgwele ya dinao ya Boteti division one go tsamaisa liki eo sentle ka e ka bulela banana ditsela.

Kgosi Supang o buile jalo kwa tshimolodisong ya metshameko ya liki eo  kwa Letlhakane bosheng.

A re tshwaragano le neelano di botlhokwa ka e leng tsone di ka tlhotlheletsang maikaelelo a bone.

Komphane ya Lucara Botswana e rotloeditse liki eo ka P500 000 mo dingwageng tse pedi.

Kgosi Supang  o ne a  akgola komiti e go bo e eme ka dinao  go tsosolosa motshameko wa kgwele ya dinao kwa kgaolong ya Boteti    

Kgosi a re ba tshwenngwa ke botlhoka tsebe jwa banana ka jalo a kopa gore fa ba aga ditlhopha tsa kgwele ya dinao  ba sekasekele  banana ba ba feditseng dikolo mme ba sa dire sepe.

A re metshameko e botlhokwa ka e ntsha banana mo mebileng gape ba ka kgona go itshetsa ka yone le go betla bokamoso.

Kgosi Supang  o ne a ba rotloetsa gore fa ba na le bana ba leke go ba aga le go  ba  lemotsha  mekgwa ee siameng ya botshelo

A re metshameko e aga botsalano e bile e rotloetsa itshidilo mmele.

O bile a ba kgotlhatsa gore ba ikopanye le  batsadi ba bana ba ba mo ditlhopheng  tsa bone gore  ba kgone go rotloetsa bana go tsaya  metshameko ka tlhwaafalo.

Kgosi Supang o kgothaditse komiti go okela batshameki ba pele le barati  ba kgwele ya dinao kwa mabaleng le go bontsha  banana botsipa jwa kgwele ya dinao.

Modulasetilo wa komiti ya Boteti Division 1, Rre Philemon Bunu, a re ba  lesego ka jaana, mo dikgaolong tse lesome le bosupa tsa liki eo, ke  bone  fela ba boneng  thotloetso ya madi  aa kana.

Rre Bunu a re mo ditlhopheng tsa bone di lesome le bobedi, se le sengwe se tswa Rakops, tse pedi tsa Orapa le di lesupa tsa Letlhakane .

 A re Lucara Botswana e file ditlhopha kapari tse pedi . 

O ne gape a re go apesitswe komiti diterekesutu tse pedi , sekipa le diteki, a tswelela a re  go apesitswe batsamaisi ba metshameko ba le lesome le bobedi ka kapari tse pedi.

Rre Bunu a re batsamaisi ba metshameko ba atswiwa  ka P100 motshameko mongwe le mongwe gape ba fiwa sepalamo

Liki e e ne ya semolodisiwa ka motshameko wa setlhopha sa Diamond Chiefs  sa Letlhakane  le Field Masters go tswa kwa Orapa. Field Masters e fentse ka dino tse pedi go lefela 2-0. Bokhutlo