07 Oct 2019

Tona wa Peeletso, Papadi le Madirelo, Mme Bogolo Kenewendo, a re go botlhokwa gore bagwebi ba amogane kitso le go tsaya malebela mo go ba bangwe.

Tona Kenewendo o buile jalo kwa moletlong wa Market Street/Metlhala ya Khumo Hybrid kwa Letlhakane bosheng.

A re ditshupo tse di simolotse ngwaga o o fetileng, maikaelelo a tsone e le go godisa dikgwebo le go kopanya bagwebi.

A re ba leka gape go bapatsa dithoto tsa Batswana, mme a kgothatsa bagwebi gore ba tlogele lefufa, mme ba reke dithoto tsa ba bangwe.

Tona o ne a rotloetsa bagwebi go bereka ka thata gore ba godise dikgwebo tsa bone le go  ntsha dithoto  tse dintsi gape di na le boleng.

Mme Kenewendo a re o dumela gore lenaneo le le tla tsisa diphetogo mo mohameng wa kgwebo, mme go nne le ditiro le go dira dithoto tse ditla lekanang lefatshe leno le a mangwe.

A re kgaolo ya Boteti e na le mmaraka ka e na le ditswammung, ditsatlholego le bojanala.

A re kgaolo ya Boteti e tshwanetse go bereka thata mo go tsa bojanala jaaka dikgaolo tsa North West le Chobe, ka ba na le ditsatlholego tse di tshwanang le tsa bone.

 A re ba tlaa rotloetsa dikgwebo tse di potlana gore di ntshe dithoto tse dintsi tse di ka lekanang go jesa  lefatshe leno, a tlatsa ka gore  lephata le tlaa  netefatsa gore dithoto tseo di bona mmaraka.

Mme Kenewendo a re puso e  dumelane le dikgwebo tse ditona gore di reke dithoto tsa Batswana, a re se se tlaa rotloetsa kgolo ya dikgwebo tse di potlana le ya itsholelo ya lefatshe.  

Mothusa kgosi kwa Letlhakane, Kgosi Ewetsemang Rethatoleng o ne a kopa banni go tsaa malebela mo  bagwebing ba bangwe.

Kgosi a re mongwe le mongwe o batla khumo, mme a ba gakolola go latela metlhala ya khumo ba  bo ba itirela dijo.

Mokwaledi wa khansele potlana ya Boteti, Rre Milton Keitshokilwe a re go botlhokwa gore bagwebi ba dirise sebaka se go anya kitso ka go tlhabolola le go godisa dikgwebo tsa bone . 

Rre  Keitshokile o ne a kgothatsa banni ba Boteti go tsaya dikgakololo tsa kgwebo, mme ba sale metlhala ya khumo morago

A re kgaolo ya Boteti e na le letlhoko la ditiro le le kwa godimo, mme fa dikgwebo di ka gola bangwe ba simolola dikgwebo dika fokotsa letlhoko le. Bokhutlo