01 Oct 2019

Mogolwane wa tsa moepo wa Orapa, Letlhakane and Damtsha Mines Rre Thuso Mogotsi  o kopile banni ba Orapa go tsaya letsatsi la boipuso ka tlhoafalo.

Rre Mogotsi o buile jalo kwa  moletlong wa go ipelela boipuso  jwa dingwaga tse di masome a matlhano le boraro kwa Orapa ka Mosupololgo.

O ne a tlhagisa banni ba toropo eo a re ga ba a tshwanela go tseela  moletlo o  wa go ipelela boipuso  kwa tlase,  a re ba tshwanetse go supa boitumelo le lorato ka jaana mo dingwageng tse di masome a matlhano le boraro ba ntse ba tshelela mo kagisong.

Rre Mogotsi a re Batswana ba tshwanetse go nna motlotlo ka ba sa kgorelediwe ke sepe mme mafatshe a mangwe a sena le fa e le kagiso ba tshelela fela mo dintweng.

O tlhalositse fa Batswana e le tshaba e e lorato, ke sone se lefatshe la bone le melediwang mathe ke mafatshe a mangwe.

Rre Mogotsi o ne gape a balela batsena moletlo oo, molaetsa wa ga Tautona wa boipuso.

E rile a amogela batsena moletlo o, Kgosi Gowennemang Matlhare wa Mopipi a kgothatsa banni ba Orapa go tsaya letsatsi la boipuso ka tlhoaafalo mme ba le keteke go supa fa tota ba ipuisa, e bile ba lebogela tshotlhe dintle tse di diragetseng fa lefatshe leno le tsaya boipuso.

Kgosi Matlhare o ne a kopa batsadi go ruta  bana mosola wa go ipelela boipuso le gore tota go raya eng mo Batswaneng.

O ne a ba kopa gore ba  bopagane gore ba tlhabolole  selebego sa boipuso jwa bone gore batho ba tle kabontsi.

Modulasetilo wa komiti ya boipuso wa Orapa, Rre Isaiah Ditiso o ne a supa banni ba Orapa ka monwana a re ga ba tle diphuthegong tsa go rulaganyetsa moletlo wa boipuso, a tlatsa ga go re ba ntse ba tshwara diphuthego maitsebowa batho ba buile kwa ditirong mme maiteko a bone a itaya se fololetse.

E rile a afa lefoko la kgothatso moruti wa kereke ya Bible Life Rre Kealeboga Rasekoko a re lefatshe leno ga le a ema golo go le gongwe.

A re fa le tsamayang teng  gompieno ga go tshwane le maloba.

Mokhanselara wa pele wa Orapa Rre  Keletso Seloi o ne  a leboga komiti ya boipuso gore le fa ba ne ba lebanwe  ke dikgwetlho,  ba kgonne go dira tiro  ka botswa pelo.

Rre Seloi o ne a kopa banni ba Orapa go tshwaragana le komiti e e bakanyetsang  moletlo wa boipuso gore o atlege. BOKHUTLO