25 Sep 2019

Go tlaa simolodisiwa lefelo la itloso bodutu la bagodi kwa Maun mo bogaufing,. 

Mongwe wa basimolodi ba lefelo leo la Polokong, Mme Beauty Bagwasi, a re o itumelela go bo a fitlheletse toro ya gagwe ya go direla bagodi lefelo la mofuta o.

A re kago ya lefelo leo, le le kwa kgotleng ya Matlapana, e simologile ka 2016 go le thata, mo a kileng a akanya go fetola mogopolo, mme ka thata ya Modimo, a tsweledisa tiro eo, ka jaana a ne a batla go dira pharologanyo mo matshelong a bagodi.

Mme Bagwasi a re o ne a tswelela ka go apeela bagodi le go etela ba ba sa kgoneng kwa malwapeng, mme bangwe a ba phephafaletsa bonno.

A re bagodi ke batho ba ba botlhokwa mo setshabeng, ka jalo, ba tlhoka go tlamelwa le go fiwa lerato. 

A re go bo lefatshe leno le rena ka kagiso le thitibalo, ke ka ntlha ya bagodi ka jaana ba ne ba sireletsa dilo tseo.

Mme Bagwasi a re go botlhokwa go lemoga tiro e bagoi ba e dirileng ka jaana bangwe ba le fa ba leng teng mo botshelong ka ntlha ya kgodiso le tlhokomelo ya bagodi.

A re go ngomola pelo go bona bagodi bangwe ba tshelela mo khumanegong le mo bodutung. A re se ke sone se dirileng gore a tie moko, mme a simolodise kago ya lefelo le ba ka iketlang kwa go lone; ba tlamelwa ka dijo, mme maitseboa ba boele malwapeng. 

E rile ka Matlhatso, mekgatlho mengwe e ne ya thusa Mme Bagwasi go penta le go phepafatsa lefelo leo, ba le baakanyetsa pulo semmuso.

O lebogetse mekgatlho le dikhamphane tse di mo emeng nokeng gore a kgone go fitlhelela toro ya gagwe, a re o na le tsholofelo ya gore mo bogautshwaneng, lefelo leo le tla wela, mme bagodi ba simolole go le dirisa. Bokhutlo