17 Sep 2019

Lekgarejwana la motse wa Loologane Kegomoditswe Tshwaranang o ne a tsabakela a bo a ikgapela korone ya mmabontle wa makgarejwana a a kgakala le ditlamelo (Miss RADP) wa kgaolo-potlana ya Molepolole/Lentsweletau kwa Molepolole bosheng.

Mme Tshwaranang wa dingwaga tse di masome mabedi le bone o ne a longwa serota ke Ofinah Mogau yo le ene a tswang Loologane le Kegomoditswe Molefenyane go tswa  Kweneng, ba dingwaga tse 19 le 25 ka go latelelana.

Kgaisanyo e ya mmabontle wa metse e e kgakala le ditlamelo e tshwarwa ngwaga le ngwaga go fa bommalephontsha  ba monyetla wa go itshupa bokgoni.

Makgarejwana ba supa a ne a tseneletse dikgaisanyo tseo.

Mo letlhakoreng le lengwe Kemo Baseki wa dingwaga tse di masome mabedi wa motsana wa Kweneng o ikgapetse maemo a ntlha a dikgaisanyo tsa go supa kapari ya borre.

Montsheki Thitoyamore wa dingwaga tse di masome mabedi le boraro le Odirile Mosidi wa tse di masome mabedi le bone le bone ba ne ba tsaya maemo a bobedi le a boraro ka tatelano go fenya makolwanyane a mangwe a matlhano. Dikgaisanyo tse di mo ngwageng wa bosupa.

Mo dingwageng tse thataro tse di fitileng, Loologane o ntse a itlhoma kwa setlhoweng.

Bafenyi ba thulaganyo eo ba tlaa nna le sebaka sa go iteisanya borathata mo dikgaisanyong tsa kgaolo ya Kweneng tse di rulaganyeditsweng go tshwarwa Ngwanaatsele a rogwa kwa metsana e le metlhano ya kgaolo-potlana ya Letlhakeng e tlaa nnang le kemedi teng.

Mo mafokong a tebogo, modulasetilo wa khansele-potlana ya Molepoloe/Lentsweletau mokhanselara  Botokanyana Motoroko, o iteetse thulaganyo e  legofi, ka e efa bana sebaka sa go nna le boikarabelo.

“Mo lobakeng le le fetileng batho ba metsana e e kgakala le ditlamelo, ba ne ba dirisiwa ditiro tsa kgatelelo ka go lemogwa fa ba tlhaela lesedi ka se e leng tshwanelo ya bone, mme dithulaganyo di tshwana le tsa Miss RADP di ba fa sebaka sa go itharabologelwa go lemoga se ba leng sone,” ga bua mokhanselara.

Mokwaledi wa khansele-potlana ya MAA Rre Gofaone Kgabanyane a re o kgothala le go feta ka go lemoga kgolo ya thulaganyo e, ntlha e a reng e supa kgatelopele mo maitekong a se puso e ikaelelang go se dira.

E rile a bua ka maikaelelo a thulaganyo eo, Mmaboipelego wa Molepolole/Lentsweletau Mme Botho Mbwe a tlhalosa fa dikgaisanyo tsa Miss RADP di dirilwe ka maikaelelo a go fa basha ba dikgaolo tse di kgakala le ditlamelo sebaka sa go itemoga ka go supa ditalente tse di fitlhegileng go thusa go tokafatsa seemo sa matshelo a bone.

Mmaboipelego a re lenaneo le, le fa gape bana bao sebaka sa go itshepha ka go tsena mo lefatsheng la kgaoisanyo e seng go direlwa e se nama. BOKHUTLO