05 Sep 2019

Mogolwane wa mapodisi a Sejelo kwa Kanye, Superintendent Mogomotsi Matlapeng a re ba tshwere monna mongwe mabapi le magatwe a gore o dirisa ngwana botlhaswa.

Supt Matlapeng a re monna yoo o tshwerwe morago ga gore mapodisi a amogele pego ka mme mongwe a supa fa go na le monna mongwe yo o dirisang ngwana wa gagwe botlhaswa.

Supt. Matlapeng a re monna yoo, yo o dingwaga di masome  a mane le boferabobedi wa meraka ya Longwe, go bonala a ntse a tlhakanela dikobo le ngwana wa dingwaga tse some kwa merakeng ya Lotlhware kwa e leng gagabo mosetsanyana yoo.

Supt Matlapeng a re mo nakong eno, ngwana o isitswe kwa kokelong go thusiwa ke ba bongaka, fa monna yoo a tlaa itshupa fa pele ga lekgotla go arabela molato oo. 

Mo dikgannyeng tse dingwe, monna wa dingwaga tse di masome mane wa kgotla ya ga Mafhikana kwa Kanye o ikaleditse.

Se se boletswe ke mogolwane wa mapodisi a Kanye, Superintendent Mmoloki Mogale mo potsolosong ka Labobedi,

Supt Mogale a re monna yoo, o fitlhetswe a akgega mo setlhareng mo sekgweng gone kwa ga Mafhikana, gaufi le mafaratlhatlha a ditlhaeletsanyo, morago ga gore go begelwe mapodisi fa a sa bonwe.

Supt Mogale a re rre yoo, yo e neng e le mmereki wa NFTRC mo Kanye, ga a a tlogela molaetsa ope.

O  ne a kopa setshaba go kopa thuso fa ba na le mathata, go na le go ikgapela botshelo. BOKHUTLO