05 Aug 2019

Mme Angela Jagter o fentse mmabontle wa ditshupo tsa Kgalagadi Borwa.

Nngwe ya dimpho tsa gagwe ke P2 000.

O ne  a longwa serota ke Mme Botshelo Sedimonyane ka P1 500 mme a boraro a ikgapelwa ke Mme Matshidiso Asele yo o atswitsweng ka P1 000.

Ba ba gaisitsweng ba ne ba tlhatswiwa diatla ka P300.

Mogolwane kwa lephateng la banana, Rre Keabetswe Motswasele  o ne a tlhalosa fa makgarejwana a le lesome le bongwe go tswa mo  metseng e supa mo kgaolong eo   a ne a tsene dikgaisano tseo.

O boletse fa dikgaisano tseo di tsamaile sentle ka di ne di tshologetswe ke palo ee kwa godimo ya batho.

Rre Motswasele o boletse fa khamphane ya Mascom e ne ya barotloetsa ka go abela bommabontle dikipara le dihutshe le gone go ba thusa ka kapari ya ntlha go itshupa mo seraleng ka nako ya dikgaisano.

O boletse fa Mme Jagter a tlaa tswelela e le sefatlhego sa mmabontle wa ditshupo go fitlhelela ngwaga oo tlang fa go tshwarwa dishupo gape. BOKHUTLO