22 Jul 2019

Mothusa kgosi kwa kgaolwaneng ya Peleng kwa  Lobatse, Kgosi  Modise Senyerelo o akgoletse komiti ya ditlhabololo ya Peleng West go emela morafe ka dinao.

Kgosi Senyerelo o buile jalo fa komiti eo e ne e abela banni  bangwe ba ba tlhokileng lesego dimpho tsa dikobo di le masome a mabedi.

A re go fiwa mpho ke selo sa botlhokwa e bile se baka boitumelo mo botshelong jwa motho.

Modulasetilo wa komiti eo, Rre Donald Mokgatla, o boletse fa maikaelelo a  bone e le go direla setshaba, a tlatsa ka gore mo nakong ee fetileng, ba abetse bana dimpho tsa keresemose, a re  ba  dira se ka se le mo mokwalong o o tsamaisang komiti eo.

O tsweletse a bolela  gore ba ne ba gopola ba ba tlhokileng lesego, bogolo jang mo nakong e ya mariga, mme batla ka mo gopolo wa go kopa thuso mo makalaneng a puso, le a a ikemetseng le batho ka bongwe ka bongwe gore ba thuse.

Rre Mokgatla o boletse gore yo o abelwang o lesego, mme a kgothatsa gape ba ba amogelang gore ba seka ba ikgantshetsa ba ba sa fiwang sepe. 

Mongwe wa ba abetsweng dimpho, Mme Naledi Nthutang o ne a leboga komiti eo go menagane, a kopa gore Modimo o tswelele o ba thusa, ba lemoge letlhoko la ba bangwe, mme  ba ba thuse. Mme Mary Senye o ne a lebogela komiti eo tiro e ntle e ba e dirileng, a leboga le bone ba ba  thusitseng ka dimpho. BOKHUTLO