22 Jul 2019

E re le ntswa mogopolo wa go simolodisa mokgatlho wa go dirisa di-tsatholego o akaretsa metse yotlhe ya kgaolo ya botlhophi ya Shoshong, banni ba motse wa Shoshong ba tsere tshwetso ya go ikemela ka nosi.

Ba supile maikaelelo a go go dira jalo kwa phuthegong ya kgotla e e neng e buisiwa ke mogokaganyi wa lekalana le le okametseng mekgatlho ya setshaba ee dirisang meamuso ya tlholego go itshetsa, Rre Boatametse Modukanele.

Morafe o tsere tshwetso ya go ikemela ka nosi  morago ga tekodiso ya modulasetilo wa mokgatho wa Lethongwa Trust, Rre Kabelo Itumeleng.

A re maikaelelo a go simolodisa metswedi ya go tsenya madi a go dirisa ditsa-tlholego a mogoga moleele. 

A re le fa ba sale ba kwadisitse mokgatlho ka ngwaga wa 2011 ga gona sepe se ba ka se supang.

O tsweletse a supa fa motse wa Shoshong o humile ditso tsa merafe ya Bangwato, Baphaleng le Bakaa.

Rre Itumeleng a re matota a merafe eo, a itsegeng ka leina la Old Shoshong a humile ditso tse di ka kgonang go tsenya madi.

O tlhalositse gore e ne yare ba ntse ba tlhotlhomisa gore gare go tseneng ba utlwalela menahune ya gore go na le mongwe yoo lebegang a ba eme tseleng, ka gore o na le maikaelelo a go dirisa lefelo  le o a le nosi.

 Le fa go ntse jalo, Rre Itumeleng o supile fa a dumela ba le mo tseleng ya go dira tse di tlhokwang gore ba felele ba dira tiro e ba e romilweng ke morafe.

A  re sengwe sa tse di nyafatsang mosepele wa bone ke gore tsamaiso e lopa gore sepe se ba ka se dirang ba lekodise pele metse yotlhe e e nang le kemedi, ka jalo mo mabakeng mangwe maiteko a go kopana mo metseng mengwe a folotsa mme seo se emise tiro go tswelela.

E rile ba tsibogela kgang eo, banni ba supa fa ba nyoretswe go bona mokgatlho o dira, gore ba kgone go itirela madi ka letlotlo la tlholego le le mo tikologong ya bone le ditso tse di nonneng tsa motse.

Mme Fibi Madiabaso a re o dumela gore tikologo ya Shoshong e na le ditsa-tlholego tse di nonofileng go ka dira gore ba kgone go itirela mokgatho ba le nosi.

Mongwe wa magosi a Shoshong, Rre Pulediso Abonne a re le fa ngwao e na le seabe se se bonalang mo go godiseng bojanala jo bo ka thusang go tlhabolola motse, o tshwenngwa ke gore mafelo mangwe a e eleng matlotlo a ngwao a ne a senngwa ke mophato wa Maholosa o romilwe ke morafe.

A  re o gakologelwa gore ka dingwaga tsa bo 1960, mophato o ne wa romiwa go folosa dibeela tse go neng go dumelwa gore di kgoreletsa pula.

“Mophato wa Maholosa o ne o tsamaya le makhubu a a dikaganyeditseng motse wa Shoshong  ba folosa ebile ba thuba dinkgwana le tse dingwe tsa ngwao tse ba neng ba di fitlhela mo matoteng.”

Rre Modukanele o ne a bolela fa puso e rotloetsa merafe mo mafelong ka go farologana go bopa mekgatlho e e tla dirang gore ba kgone go akola meamuso ya tlholego ee mo tikologong ya bone.

O supile gore mafelo mangwe a humile ditso ka go farologana, fa mangwe a one e le mantlenyane a tlholego a a ka kgatlhang matlho a baeti.

O supile gore merafe e ka ipopa mme ya dumalana go dira mokgatlho wa mofuta o.

“Metse e e bapileng kana e le mo kgaolong e le nngwe le yone e ka dumalana go tshwaragana go bopa mokgatlho o le mongwe gore ba kgone go kgaogana dipoelo tsa meamuso ya tlholego e mo tikologong ya bone.”

Rre Modukanele a re mokgatlho o kopanetsweng ke metse e feta bongwe o ka thusa ba tikologo ya bone e senang sepe se se ka okang bojanala gore le bone ba kgone go bona dipoelo.

Le fa go ntse jalo, o tlhalositse gore tsamaiso ya go kwadisa mokgatlho wa mofuta o, ga e kgoreletse metse go ikemela ka bonosi.

O tsweletse a supa gore fa metse e e mo kgaolong e dumalana go kopanela  tiriso ya ditsa-tlholego tse di mo tikologong ya bone, motse mongwe le mongwe o e leng leloko la mokgatlho o tshwanetse wa nna le kemedi.

Le fa go ntse jalo, Rre Modukanele o tlhalositse gore mo mabakeng mangwe selo se se kopanelwang ke batho ba le bantsi se kgona go nna le madiadia ba sa kgone go dumalana ka se ba batlang go se dira.

 “Boamaruri ke gore mokgatho o o kopanetsweng ke metse e le mentsi o opisa tlhogo ka gole gantsi go nna thata go tsaya ditshwetso ka nako.” BOKHUTLO