16 Jul 2019

Mopalamente wa Serowe Bokone, Rre Kgotla Autlwetse, o kgothaditse dikomiti tsa ditlhabololo tsa metse e e gaisitseng e mengwe ka bophepha go dirisa  madi a ba a gapileng mo dikgaisanyong go reka di dirisiwa tse di phepafatsang.

O buile se, fa a ne a abela metse ya Moreomabele, Gojwane, Serule le Topisi dimpho ka go latelana ga yone mo bophepeng.

Moletlo wa kabo dietsele o ne o tshwaretswe kwa wa Gojwane bosheng.

Rre Autlwetse, yo e bileng e le morotloetsi mogolo wa dikgaisano tsa bophepa tsa kgaolo ya gagwe, a re maikaelelo a go simolodisa dikgaisanyo tse ke go tiisa dikomiti tsa ditlhabololo moko. 

O ne a supa fa a ne a rolela khansele potlana ya Tonota le ya Palapye mogopolo wa gagwe ka e le bone ba itebagantseng le go tlhokomela tikologo e bile ba na le bomaitseanape ba ba rutetsweng tiro ya tsa tikologo.

 Rre Autlwetse o ne a supa fa a tshwaraganetse tiro e le World Group of Companies ba a tswang kgakala a ntse a thusana le bone go tlhabolola matshelo a batho ba kgaolo ya gagwe.

Moreomabele o o gapileng maemo a ntlha o ne wa abelwa P4000, setlankana le kopi, o longwa serota ke Gojwane go ikgapela P3000 fa Serule a le mo maemong a boraro mme wa tswa ka P2000 fa Topisi a gapile P1000.

Ditlhopha tsa mmino wa Setswana, bodiragatsi jwa motshameko le khwaere ba ne ba abelwa makgolo a marataro bangwe le bangwe, mmoki a ne a fiwa madi makgolo a mane a dipula.

Kgosi Oagile Ketlhaetse wa Gojwane o ne a supa fa bophepa e le selo se motho a tshwanetseng go tshela naso ka nako tsotlhe.

 Kgosi Ketlhaetse a re tikologo e e phepa e rotloetsa boitekanelo le botsogo jo bo siameng ka leswe le sa siamela botsogo jwa motho, o ne a supa fa a tshwentswe ke matlotla a a tletseng mo motseng ka a sena batlhokomedi.

E rile a tlhalosa maikaelelo a letsatsi mokwaledi wa ga tona Rre Tinabo Chabaesele a re tikologo e tshwanetse go nna e e phepa ka nako tsotlhe go hema malwetse. 

Rre Chabaesele o ne a gwetlha banni ba metse eo go tsaa maikarabelo a go bona gore tikologo e mo seemong se se kgathisang ka seo se ka ngoka bagwebi, mme seo se ba tlhamela mebereko mo metseng ya bone. 

Mokwaledi o ne a supa fa maikaelelo magolo a dikgaisano tsa metse e le go rotloetsa botsalano le tshwaragano ya batho ba dikgaolo tseo. Bokhutlo