25 Jun 2019

Sekole se segolwane sa Masilo kwa Molepolole se ne sa tsaya maemo a ntlha mo kgaisanyong ya moopelo e e neng e tshwerwe ke ba Association of Botswana Schools Performing Arts (ABOSPA), mo dikoleng tse dikgolwane tsa kgaolo ya Kweneng.

Dikgaisanyo tse di neng di tshwaretswe kwa Letlhakeng, maikaelelo a tsone e ne e le go tlhopha sekole se se tlaa emelang Kweneng kwa dikgaisanong.
Sekole sa Masilo se ne sa ema ka maemo a ntlha ka 70 per cent fa Letlole Mosielele go tswa Mmankgodi se ne sa tsaya maemo a bobedi ka 51.1 per cent.

E ntse e le mo dikgaisanyong tsa moopelo, sekole se sebotlana sa Lewis go tswa kwa Molepolole se ne sa tsaya maemo a ntlha ka 79 per cent, fa maemo a bobedi a ne a tsewa ke Moamogwa go tswa Mogoditshane ka 72.5 per cent fa maemo a boraro a gapilwe ke sa Mantswabisi ka 68 per cent.

Mo mminong wa Hosana, sekole se sebotlana sa Taumanthe go tswa Mmopane se ne sa tsaya maemo a ntlha, sa Kumakwane se ne sa tsaya maemo a bobedi fa sa Phuthadikobo go tswa Molepolole se ne sa gapa maemo a boraro.

Mo mminong wa Tsutsube wa dikole tse dikgolwane, sekole sa Mahupu go tswa Takatokwane se ne sa tsaya maemo a ntlha, sa Sekgele go tswa Thamaga se ne sa gapa maemo a bobedi fa memo a boraro a tserwe ke Mogoditshane JSS.

Mo motshamekong wa diketshe wa dikole tse dipotlana sekole sa Solomon Dihutso go tswa Mogoditshane se ne sa tsaya maemo a ntlha, maemo a bobedi a gapiwa ke sekole sa Malwelwe fa a boraro a tserwe ke sekole sa Lephaleng go tswa Molepolole.

Mo dikoleng tse dikgolwane sekole sa Thamaga JSS se ne sa gapa maemo a ntlha ka motshameko wa seketshe, maemo a bobedi a gapiwa ke sekole sa Lempu go tswa Salajwe fa a boraro a tserwe ke sa Mphuthe go tswa Letlhakeng.

E ntse e le mo dikoleng tse dikgolwane Oreeditse Ramotlopi go tswa sekoleng sa Macheng kwa Sojwe o ne a tsaya maemo a ntlha ka leboko, maemo a bobedi a tsewa ke Bofelo Bobonywe go tswa Mphuthe fa Kenaleone Rasekao go tswa Mahupu a gapile maemo a boraro. BOKHUTLO