11 Jun 2019

Balemi ba Makobeng Cluster Fence go bapa le Moshopha kwa kgaolong ya Legare ba rotloeditswe go epa ditlhare tse di mo masimong a bone gore ba kgone go lema diekere tse dintsi.

Se se builwe ke mokhanselara wa Ramokgonami, Rre Motsemeng Letswamotse bosheng.

Rre Letswamotse a re ga go itumedise go bo puso e dirisa madi a mantsi go thusa Batswana go agelela masimo, mme e re kwa bofelong beng ba masimo ba bo ba lesa ditlhare di mela ka ba sa leme.

O boletse fa sekgwa se se ageletsweng e le selekanyo sa dikhilomethara di le lesome le bosupa, mme mo teng go na le ditema di feta sekete, mme tse di epilweng e bile di ka lemiwa di makgolo a mararo le masome a mabedi le botlhano.

 A re se ga se itumedise ka lefatshe le le ntsi le sa remiwa, mme le ageletswe fela ntswa lefatshe leno le tlhaelelwa ke dijo.

Rre Letswamotse a re lenaneo la go agelela masimo la cluster fencing le dirilwe go lebilwe dikgang tse di tshwenyang balemi thata jaaka leruo le le senyang dijwalo.

O ne a kopa balemi ba Makobeng go ntsha leruo la bone mo teng ga kagelelo eo, a bolela fa go sa letlelelwe gore le nne mo teng ga terata eo. 

A re fa balemi bao ba sa ntshe leruo la bone, go tlaa bo go sa direlwe ba ba ntshitseng leruo la bone sentle e bile leruo le tla a tswelela le senya dijwalo.

Rre Letswamotse a re madi otlhe a a dirisitsweng mo go ageleleng masimo a balemi bao ke P1 184 970, mme a kopa balemi go lema thata gore ba kgone go jesa lefatshe leno.

O ne a lebogela maloko a mokgatlho wa Makobeng Cluster Fencing go ikopanya ba bo ba agelela masimo a bone. 

Modiri wa lephata la dijwalo wa kgaolo ya legare, Mme Oarabile Letsatsi o ne a bolela fa go na le ditlhopha tsa cluster fencing mo kgaolong ya legare di le masome a mabedi.

O boletse fa lenaneo le la go agelela masimo le na le thulaganyo e nngwe ya go epa sediba, mme a rotloetsa balemi go ikopela go epelwa sediba.

Mme Letsatsi o ne a bolela fa lephata la gagwe le tshwenngwa ke kgang ya gore masimo a a ageletsweng ao, a sa lemiwe e bile a sa ntse a tletse dikgwa.

O ne a rotloetsa beng ba masimo ao go adima ba ba batlang go lema masimo a bone. 

A re maikaelelo a terata eo ke go sireletsa dijo.

O ne a ba itsise fa go ne ga tlhagoga seboko se se jang mmidi se se tswang kwa lefatsheng la Amerika. 

Mme Letsatsi a re se a tshwenya ka se kgona go ja dinawa fa go sena mmidi, kana se je bojang fa go sena temo.

A re lephata la gagwe le simolotse go se lwantsha mme ga le rotloetse tiriso ya ditshefi. 

A re se kgona go baya mae a le mantsi nako e le nngwe fela. 

Mme Letsatsi o ne a kopa balemi go thusa lephata la temo-thuo go lwantsha seboko seo. Bokhutlo