02 Jun 2019

Ramapodisi a Botswana, Rre Keabetswe Makgophe a re go ata ga kgokgontsho kwa kgaolong ya Ghanzi ga go jese diwelang.

O buile seo bosheng, fa a rola semmuso lenaneo la Kgomo-Khumo kwa Ghanzi bosheng.

Rre Makgophe a re kgaolo ya Ghanzi e aperwe ke mathata a mantsi a borukutlhi, bogolo segolo jo bo amang dikgang tsa kgokgontsho ya bomme le bana ba basetsana.

A re dipalo tsa dipolao le dipetelelo tsa bo mme le bana, di kwa godimo kwa kgaolong ya Ghanzi. 

O ne a tlhagisa gore ba ba tlhakanelang dikobo le bana ba ngwaga tse di kwa tlase ga lesome le bofera bobedi, ba tlaa di gama ba sa dilthapela ka e le molato go dira jalo.

“Ba bangwe ke bo malome ba intshitseng baba mo ditlogolong tsa bone. Fa o tsaya ngwana wa lesika la gago, o re o ya go nna le ene kgotsa o ya go motlhokomela, o bo o mo tsaya o mo isa morakeng a ya go disa leruo la gagwe, ba gago bone baya dikolong, o tshwana fela le motho yo rekisang bana kgotsa yo o gwebang ka bana,” Rre Makghophe e a ntsha tlhagiso jalo.

O ne a supa gore mapodisi a tlaa abela kgotla e tona ya Ghanzi ditilo di le lekgolo, mo godimo ga moo ba tlaa abela sekolo sa bana sa Morama Day Care Centre setofo sa gase le ditilo tsa bananyana. BOKHUTLO