30 May 2019

Banni ba kgotla ya Tsopye kwa Kanye ba abetse sekolo se sebotlana sa Makaba dipara tsa ditlhako di le masome a mabedi le dikausu di le masome a mabedi.

Madirelo a Debonairs Pizza one a ne a abela baithuti diatlana di le masome a mabedi.

Kgosi wa Tsopye, Rre Obusitswe Kgame, o ne a tlhalosa fa maikaelelo a banni ba kgotla eo, e e mo kgaolwaneng ya bokhanselra ya Nyorosi Botlhaba, e le go tshwaragana gore kgaolwana eo e tswelele pele.

Ba ne ba tsaya tshwetso ya go ema  nokeng sekolo seo ka jaana ba ne ba sa itumedisiwe ke maduo a sone a lokwalo lwa bosupa a  ngwaga wa 2017.

Rre Kgame a re batsadi ba ne ba akanya gore sengwe se katswa se tlhaela, mme ba kopana le mogokgo go utlwa gore matsapa di a tsaya kae.

Morago ga bokopano joo, batsadi ba ne ba lemoga fa thuto e tlhoka gore fa go le mariga moithuti a seka a babalelwa ke serame, mme batswa ka moono wa go thusa baithuti ba sekolo seo ka ditlhako le dikausu mo pakeng ya mariga.

A re e rile mo ngwageng o o fitileng wa 2018, ba rekela baithuti ba sekolo seo ba le lesome le bobedi ditlhako le dikausu ka paka ya mariga mme ya re maduo a lokwalo lwa bosupa a tswa sekolo sa dira botoka thata fa go tshwantshwanngwa le ngwaga wa 2017.

Kgosi Kgame a re ka ngwaga wa 2017 sekolo seo sene se na le letshwao la A le le lengwe mme sa gapa 66 mo lekgolong.

Ka 2018 sa tokafatsa ya nna 82.6 mo lekgolong le bo A ba supa mme seo sa ba tsenya moko go tswelela ka moono wa bone wa go rekela baithuti bangwe dilwana tsa mariga.

Kgosi Kgame o tlhalositse fa badira jalo ka boithaopo e le batsadi, komiti ya ditlhabololo tsa motse, baoki ba ba tlogetseng tiro ka bogodi le bagwebi bangwe.

Mo go tse dingwe kgosi o ne a kopa banni ba kgaolwana eo go ema ka dinao go lwantsha borukutlhi mo kgaolwaneng eo a supa fa bo tshwenya thata, a re batsadi ba thuse ba tsenye kgalemo mo baneng ba bone.

Mpho eo e ne ya abiwa ke mookamela mapodisi wa kgaolo ya Borwa No:14 District Senior Superintendent Reuben Mphoeng mme ya amogelwa mo boemong jwa sekolo seo ke mogokgo wa sone Rre Dickson Ramagang.

Senior Suprintendent Mphoeng o ne a lebogela kgosi go rotloetsa morafe go tsenya letsogo mo ditirong tsa setshaba le mo go lwantsheng borukutlhi.

A re go lwantsha borukutlhi ga se go isa motho kgolegelong fela, a re gape ke go aga motho gore a itharabologelwe mo go direng borukutlhi mme a fetoge.

O lebogile banni ba kgotla eo gammogo le ba cluster No:6 go bo ba bone gore sekolo ke sa bone, le baithuti ke bana ba bone mme ba se ema nokeng.

A re se ba se dirang ke go thusa lefatshe gore le gatelepele ka jaana ba rotloetsa bana, ka ele bone bokamoso jwa lefatshe leno.

Rre Ramagang ene o boletse fa  go lesego letsogo le le abang gona le le le amogelang, a tlhalosa fa mpho eo e tlaa fetela kwa baneng ba ba maleba.

Mopalamente wa Kanye Borwa, Rre Abram Kesupile, o ne a kopa batsadi go thusa ba cluster No:6 go ba tsaa tema fa ba tlhaetseng teng.

Rre Kesupile o kopile banni ba kgotla eo gore fa ba thusa sekolo ba seka ba tsaya ditiro di le dintsi  mme ba itebaganye le tiro e le nngwefela gore ba tla ba kgone. BOKHUTLO