23 May 2019

Beng ba dikonteraka ba ba abelwang ditiro tsa puso ba kgaletswe go dia ditlhabololo, segolo jang go agwa ga ditsela.

Mopalamente wa Sefhare/Ramokgonami, e bile e le tona wa  dipalamo le ditlhaeletsanyo, Mme Dorcas Makgato o buile jaana a buisa diphuthego kwa Ngwapa, Mokobeng, Moshopha, Letloreng le Machaneng, go lekodisa banni ka tsa lephata la gagwe.

Mme Makgato a re tsamaiso e tlhoka go baakanngwa gore tsotlhe di boele mo seemong.

O supile fa puso e sale e abile madi gore ditsela tse di tlhokang go tlhabololwa di dirwe, mme ga nna madiadia, a bakwa ke  dikgang tsa boikuelo tsa beng ba dikonteraka tse di fa pele ga makgotla a ditsheko.

A re madiadia ao, a tlhoka go rarabololwa gore a seka a dia ditlhabololo, ka gape seo se ama le tsone ditlhwatlhwa, ka di gola ngwaga le ngwaga.

Mme Makgato a re o itemogetse fa ditsamaiso mo lephateng la gagwe di sa tlhamalala, mme di tlhoka tharabololo

O ne a lebogela gore Tautona o lemoga botlhokwa jwa go kgaoganya lephata leo ga bedi, ka e le lengwe la maphata a matona.

A re gape go agwa ga maphata sesha ka Phalapne go ya go thusa mo go sekasekeng a a imeditsweng ditiro.

Mme Makgato o ne a supa fa lephata la gagwe e le la bogokaganyi ka legokaganya lefatshe leno le mafatshe a mangwe ka tsa maranyane a puso e tshwereng ka natla go bona gore a tsenngwa mo tirisong.

O tlhalositse fa lephata la gagwe le filwe boikarabelo jwa go gokaganya metsi, motlakase le ditlhaeletsanyo tsa maranyane ka maikaelelo a go tlhamela Batswana ditiro.

Mopalamente o ne a supa fa kgaolo ya Tswapong e neetswe boikarabelo jwa go itebaganya le tsa temo ya nosetso, ka fa tlase ga lenaneo magoboka a ditirelo la Special Economic Zone, go lebeletswe seemo sa go tswakanya itsholelelo, go na le go baya fela mo ditswammung.

A re seo gape se tlaa bo se dirwa go akaretsa  batsaya karolo mo mererong ya tsa itsholelo le go ba fa maikarabelo.

Mme Makgato a re o tlhaloganya dikgang tsa kgaolo ya gagwe jaaka tlhaelo ya metsi, ditsela, motlakase le tsa thuto, a tlhalosa fa a tsweletse ka go itebaganya le tsone ka bongwe ka bongwe.

O tlhalositse ka go thapiwa ga mogolwane wa thuto mo kgaolong eo, gore a itebaganye le seemo se se ngomolang pelo kwa dikoleng tsa kgaolo ka bophara.

A re boatlhamo jwa dikgaolo bo dia go anama ga ditlhabololo.

A re dikgaolo-potlana di tshwanetse go nna le bodiredi, ga mmogo le madi a ditsamaiso jaaka kgaolwana ya Mahalapye.

Mme Makgato o ne a ba lekodisa ka tsa palamente.

E rile a itebaganya le tshotiso ya go tlhophiwa ga ga Tautona, a re e re le tswa e fetisitswe, go santse go le go ntsi mo go tshwanetseng go dirwa, ka e ama molao-motheo, o o ka fetolwang fela fa Batswana ba dumelana ka patlo-maikutlo.

A re Batswana ba seka ba iteega tsebe ka gore seo ga se ye go kgoreletsa tsamaiso e e leng teng, ka go iwa ditlhophong.

A re ditlhopho tsa 2019 di ya go dirwa fela jaaka go ntse go dirwa tse di kwa morago. BOKHUTLO