22 May 2019

Go tlhoka go laolesega ga seemo sa borukutlhi mo Molepolole, go gwetlhile gore dikereke di tsibogele go rulaganya mogwanto, maikaelelo e le go tsibosa morafe ka matshwenyego a, segolo jang dikgang tsa dipolaano.

Merapelo e ne ya simolola mo kgotleng kgolo ya Bakwena, morago ga mogwanto o oneng wa ralala motse  o kgaogantswe ka ditlhopha tse nne e bile o eteletswe pele ke diphuthego tsa dikereke ka Matlhatso.

E rile a tlhalosa maikaelelo a thulaganyo eo, modulasetilo wa lekgotla la baruti mo Molepolole Moruti Emmanuel Ngwako, a lekodisa fa thulaganyo ya go rapedisa seemo sa borukutlhi mo Molepolole e gwetlhilwe ke Kgosi Kgari III ka go lemoga fa motse wa gagwe o sa robalelwa ke ditlhokwa.

Rre Ngwako a re thulaganyo ya go rapelela go rena ga kagiso le ledula mo gare ga Bakwena go ne go tshwerwe ka setlhogo se se reng; Tsa Pele di Fetile Dithako di ole Molepolole yo Mosha.

E ne e rile bosheng Kgosi Kgari III a bitsa phuthego ka maikaelelo a go tla go gwetlha morafe go betla methale ya go tla ka tharabololo ya dikgang tsa borukutlhi jo bo amileng Molepolole.

Phuthego ya ga kgosi kgolo e ne ya ntsha tlhobaelo ya gore bontsi jwa dipolaano di bakwa ke dikgang di akaretsa go ja le go amogela bana ba basimane mo malwapeng mme morago ba tlhanogelwe fa seemo sa matshelo a bone se fetoga.

E rile a amogela Bakwena, Kgosi Kgari III a opela legofi diphuthego tsa dikereke go bo di tsibogile ka tsholofelo ya gore go tlaa lere phetogo le go tiribatsa seemo mo gare ga morafe le go lere kagiso mo motseng.

Dingwe tsa dikgang tse di neng tsa lekodisiwa morafe ke ba lekalana la District Health Management Team (DHMT)mo Kweneng ke ya kanamo ya mogare wa HIV e go kaegang e le letshwenyo mo seemong sa botsogo jwa morafe.

Rre Kemisetso Ntshese wa DHMT o file dikai ka dintlha di tshwana le go nna le bakapelo ba bantsi, dikgang tsa kgokgontsho ya malwapa le tiriso ya ditagi, tse a tlhalosang di na le di-tla morago tsa tlhakanelo dikobo e e sa babalesegang.

O kopile Batswana go fokoletsa puso mokgweleo ka go netefatsa gore dipalopalo tsa mogare di wela tlase ka go tokafatsa boitshwaro.

Mangwe a matshwenyego a ba DMSAC ke a dikgang tsa malwetse a dikobo a dipalo tsa one tsa 1 288 di supang fa go na le kgonagalo ya kgolo ya dipalo tsa morage wa HIV ka jaana bontsi jwa batho bo santse bo amega thata mo tlhakanelong dikobo e e sa babalesegang.

Motshwarelela Ramapodisi a Kweneng Superintendent Eric Dumelang a re ba lebogela kwelotlase ya dikgang tsa go thujwa ga matlo mme ba supa fa ba tsweletse ka go itemogela kgolo ya dikgang tsa dipolao le bogodu jwa leruo.

A re dikgang tse di santse di ntlsha tlhogo mo melatong ya borukutlhi jwa kgaolo eno. BOKHUTLO