08 May 2019

Mothusa tautona Rre Slumber Tsogwane a re puso e tshwenngwa ke dipego tsa dititeo le go tlhapadiwa ga badiri ba botsogo.

Fa a bua kwa bokopanong jwa ngwaga le ngwaga jwa lekgotla la baoki kwa Palapye ka Mosupologo, Rre Tsogwane o ne a re fa seemo se se ka seka sa tsibogelwa, se ka ama maduo mo tirong.

“Ka jalo, puso e itlama go netefatsa pabalesego ya badiri mo tirong le ditshwanelo tsa bone.” 

O ne a tlatsa ka go re setshaba se tshwanetse go itse gore tshwanelo ya sone ya go bona ditirelo tsa botsogo e tlhokana le boikarabelo jwa sone jwa gore badiri ba botsogo ba sireletsegile.

Mothusa tautona a re baoki ba botlhokwa ka ba na le seabe se segolo mo go ageng Botswana ka tokafatso maduo e tlhokana le tshaba e e itekanetseng. 

A re thuso e e fiwang kwa dikokelong ke yone mmammang  mme sebe sa phiri ke tlhaelo ya babelegisi. 

Se se dira gore mooki a le esi a thuse palo e e fetang e e beilweng mme pheletsong se se isa tlase boleng jwa ditirelo.

O tladitse ka go re dipuisanyo tse di tsweletseng gareng ga lekgotla la baoki le lephata la botsogo le boitekanelo di solofetswe go ntsha ditharabololo tsa mathata.

O tlhalositse fa lekgotla la baoki le lephata la botsogo le boitekanelo ba tshwaraganetse tiro ya go nonotsha baoki gore ba itepatepanye le dikgwetlho tsa segompieno, maikaelelo e le go isa godimo serodumo sa booki.

Rre Tsogwane a re puso e solofeditse le go itlama go tsweledisa dipuisanyo le lekgotla la baoki le makgotla a mangwe a babereki.

“Re tsaya makalana a babereki le babereki e le ba re tshwaraganeng le bone go isa seelo sa Botswana sa go ntsha maduo le go iteisana borathana fa godingwana,” a tlatsa.

Bokopano jo, bo ne bo  tshegeditswe ka fa tlase ga setlhogo se se kayang kgokgontsho mo tirong e le kgwetlho fa go lebilwe tshireletsego le botsogo jwa baoki gore ba kgone go ntsha maduo.  BOKHUTLO