28 Apr 2019

Banni ba Samedupi 2 ba akgoletswe go dira ditso ka go lemago botlhokwa le tiro e ntle e mabutswapele a e diretseng setshaba.

Ba akgotswe ke bogogi jwa kgaolo bo akaretsa kgosi, baruti, mogolwane wa sepodisi le batsadi ka ba ne ba dirile moletlo go lemoga tiro e ntle ya boithaopo ya motsadi, Rre Samson Xhaaga yo o diretseng banni ka botswapelo, boineelo le lorato.

Rre Xhaaga go boletswe fa a ne a tsena mo dikomiting tsa motse di akeretsa ya ditlhabololo tsa motse, ya tlhokomelo balwetsi kwa malwapeng le ya twantsho borukutlhi mo dingwageng tse di fetileng.

Molemo le lorato lwa go direla tshaba lo ne lwa mo susuetsa go tswelela e le mothusa moeteledipele mo komiting ya twantsho borukutlhi mme ka mabaka a bogodi le go tlhoka pono, a ithola marapo ka Mopitlo.

Ke ka moo banni ba neng ba thulanya ditlhogo le bogogi kwa Chanoga go rulaganaya moletlo go leboga Rre Xhaaga. 

Ba lekgotla la Setswana kwa Chanoga le bone ba ne ba mo fa setlankana e le go lemoga tiro e a e dirileng.

Fa a bua kwa moletlong oo, moemela mogolwane wa mapodisi, Assistant Superintendent Kgakgamatso Koboyatshwene o ne a galaletsa banni a re ba dirile ditso ka ga se ba le bantsi ba ba ka dirang jalo.

A re e le ba sepodisi ba motlotlo ka tiro e Rre Xhaaga a e dirileng go lwantsha borukutlhi.

O tlhalositse fa a tsene mo komiting ya twantsho borukutlhi ka 2008 a tshwere ka thata a dirisanya le mapodisi ka nako tsotlhe.

A re o tsene morago ga gore puso e tlhabe mokgosi gore morafe o tsenye letsogo mo twantshong borukutlhi mme Rre Xhaaga a nna mongwe wa ba ntlha go ithaopela dikomiti tsa twantsho borukutlhi ka a ne a lemoga fa mapodisi a ka seke a kgone a le osi.

A re Rre Xhaaga o ne a sa ipone tsapa ka a ne a tsiboga a bo a begela mapodisi ka ditiragalo tsa borukutlhi le ntswa dikgwetlho di ne di le teng.

O kopile maloko a a setseng mo komiting go gata mo motlhaleng wa gagwe.

Rre Koboyatshwene a re o ne a sa ipeela seelo ka jaana a ne a rata tiro ya gagwe go fitlhelela a tlogedisiwa ke bogodi.

A re borukutlhi bo teng kwa Samedupi mme ga se jwa leruo fela ka go kwadisitswe dikgang tsa thubetso le go thujwa ga matlo.

A re o solofela fa a tlaa tswelela a dirisanya le komiti e e teng a thusa ka dikgakololo.

Batsadi ba Samedupi ba ba dirileng le ene ba ne ba bua ka lorato, botlhale, boikobo le tirisanyo mmogo ya gagwe mo morafeng ba kaya fa e le senatla.

Rre Modise Tshekele a re ba ithutile go le gontsi mo go Rre Xhaaga. A re o dumela fa a tlaa tswelela a ba pepetletsa mo tirong ya bone ya go lwantsha borukutlhi ka a na le botsipa.

Mme Catherine Botumile yo e leng modulasetilo ya komiti ya twantsho borukutlhi o ne a iteela kobo moroko a supa fa ba amule go le gontsi mo go Rre Xhaaga.

Kgosi Oateng Setlhodi wa Chanoga o ne a supa fa malebo e le nawa ya phure mo Batswaneng mme a lebogela tiro e ntle ya banni.

A re go maleba go lemoga tiro e mabutswapele a e diretseng setshaba bogolo jang ba sa le bostshelong e seng ba hulere jaaka e le tlwaelo.

A re ga se twantsho borukutlhi fela e Rre Xhaaga a e dirileng mme o nnile le seabe se setona mo ditlhabololong tsa motse, ke ka moo a tshwanelwang ke go phophothwa legetla.

Fa a tswa la gagwe, Rre Xhaaga yo sefatlhego sa gagwe se neng se tletse monyenyo, o ne a lebogela morafe le ba lekgotla la Chanoga go supa lorato mo go ene. Bokhutlo