16 Apr 2019

 Lekgotla la ditlhopho le kgothaditse botlhe ba ba lekanyeng go ka tlhopa go ikwadisetsa ditlhopho  mo ikwadisong e e simolotseng kgwedi eno e le lesome le borataro go fitlhelela e le masome mabedi le boferabobedi.

E rile a bua kwa ithutuntshong ya batho ba ba kwadisang ditlhopho kwa Letlhakeng, mogolwane wa lekgotla leo Rre Clifford Makhiya a re ikwadisetso ditlhopho tsa setshaba tse di tlang e fa Batswana monyetla  wa go tlhopha baeteledipele ba ba ba batlang. 

Ka jalo a supa fa go le botlhokwa gore ba kwadisi ba ditlhopho ba thuse Batswana ka botlalo gore ditlhopho tsa setshaba di tle di tsamae sentle. 

Rre Makhiya a re ithutuntsho e e thusa bakwadisi ba ditlhopho go tlhaloganya mosola wa go kwadisa batlhophi.

O ne a kaya fa lekgotla le le  efa Batswana monyetla wa go  ikwadisetsa ditlhopho gore go seka ga nna le ope yo o ka salelang kwa morago.

O boleletse bakwadisi gore go botlhokwa go netefatsa gore batho ba ba ikwadisetsang ditlhopho ba na le Omang yo o mo tirisong. 

Rre Makhiya  o supile fa buka ya batlhophi e supile gore mo dikgaolong tse dingwe  batho ba ne ba ikwadisetsa ditlhopho ba sena Omang yo o mo tirisong.

A re mo gongwe o fitlhela motho a ikwadisseditse ditlhopho mo dikgaolong tse pedi, se se bo se raya gore o tshwanetse a tlhopha kgaolo e le nngwe e a ka tlhophelang mo go yone.  

Rre Makhiya o supile fa ba rutuntshitse bakwadisi ba ditlhopho ba le 102 mo dikgaolong tsa Takatokwane le Letlhakeng/Lephepe. BOKHUTLO