02 Apr 2019

Mogodi mongwe wa kgotla yoora Kamodi kwa Kanye e rile ka mafelo a beke a kganya ka boitumelo fa bana ba gagwe, dikokomane le bangwe ba losika ba ne ba mo diretse moletlo wa go ipelela matsalo a gagwe le go lebogela Modimo go bo a mo gogile go fitlha jeno.

Fa a bua ko moletlong oo Mme Keahile Baitshoki kgotsa Mma Kentse jaaka a tlwaelesegile go bidiwa, o boletse fa dingwaga tse di lekgolo le bongwe e le palo fela mo go ene ka jaana a ikutlwa a santse a le monnye thata a bo a gatelela re ‘I am still young’.

A re o bua se ka jaana a itekanetse mo mmeleng a sena malwetse a tshwana le jwa sukiri le madi a matona, e bile le matlho a gagwe a sena bokoa bope.

A re ka jaana e le motho yo o ikanyang Modimo, o na le tumelo ya gore o santse a tlaa tshela ka lebaka.

Mme Baitshoki o tlhalositse fa a godile e le ngwana yo o boi e bile a le kutlo mo batsading ba gagwe.

A re tsone tseo ke dingwe tsa tse di mo fileng lesego la go gola a ba a tshwara dingwaga tse di kalo, a gatelela gore gape o itshwareletse ka lefoko la Modimo.

O tlhalositse fa a sa tsena sekole mo go kalo, mme a berekile ele lepodisi, a tshegeditse maemo a serrgeant ka nako ya ntwa ya lefatshe ya bobedi e e itsegeng e le ya ga Hitler.

Mongwe wa dikokomane tsa gagwe Mme Mavis Kgotlaetsho a re nkukuagwe ke motho yo o lorato, gape a rata dinyao.

A re ka lone lorato lo, o kgonne go tshwaraganya bana ba gagwe, dikokomane le ba losika go nna ngata e le nngwefela.

Mme Tlotlego Makepe le ene o kaile Mme Baitshoki e le motho yo o lorato le boineelo.

A re ke motho yo o itseng go tshegetsa lolwapa ka a agisanya a sa phatlalatse.

A re mme fa a sa rate selo o a bua go bo go fela, a gatelela ka gore Mma Kentse ke letsopa le le lesego go tshela ka boleele, mme tlhaloganyo ya gagwe e ntse e itekanetse.

Bontsi jwa dibui di boletse fa ba itumeletse go tshela le Mme Baitshoki ka lorato, ba re o ba nyadisitse gammogo le bana ba bone, ba tlhalosa fa e le leloko la motia la kereke ya Jacob’s Ladder  mme a beilwe fa fatshe ke bogodi.

Mookamedi wa kereke eo Arch Bishop Walebatla Radipitse o tlhalositse fa Mme Baitshoki a bone dingwaga tseo ka ntlha ya poifo Modimo.

A kopile bana gore ba nne le tlotlo mo batsading gore Modimo a tle a ba okeletse malatsi a botshelo ba tle ba goroge kwa dingwageng tsa botsofe.

Bishop Radipitse o tlhalositse fa Mma Baitshoki e le mongwe wa matshego a kereke eo a ka nako tsotlhe a a gopolang ka ditiro tse di molemo.

Letsatsi leo le ne la natefisiwa ka moopelo le maboko ke dikokomane tsa gagwe. Bokhutlo