31 Mar 2019

Motshwarelela mookamedi wa lekalana la ditlamelo tse di faphegileng kwa lephateng la thuto go tswa kwa moding, Mme Victoria Ramaribana a re ba-na-le bogole ba na le tshwanelo ya go fiwa boswa jwa thuto fela jaaka mongwe le mongwe.

O kgotlhaditse batsadi le setshaba ka kakaretso go netefatsa gore ba bona ditlamelo tsotlhe tse di tlaa thusang gore ba nne le isago e e nonofileng.

Mme Ramaribana a re go fa ba-na-le bogole thuto ke tshwanelo. O buile jalo ka Labone kwa Shoshong jaaka ba ofisi ya thuto mo Mahalapye ba ne ba rulagantse tiro ya go tsibosa setshaba ka thuto e e faphegileng e e fiwang ba-na-le bogole.

O kaile fa lephata la thuto le lemogile fa kitso e tlhaela mabapi le go tlamela le go ithuta go tshela le ba-na-le bogole.

Mme Ramaribana a re bana botlhe ba tshwanetse ba fiwa thuto go sa tlhaolwe ope ka popego.

“Mo-na-le bogole o na le tshwanelo ya go rutwa se ngwana mongwe le mongwe a se rutwang, mme pharologanyo ya nna ka fa ba rutwang ka teng,” ga tlhalosa Mme Ramaribana.

A re sengwe sa dilo tse ba di lemogileng ke gore bana ba ba nang le bogole ga ba wetse dithuto, mabaka mangwe e le gore ga go na yo o tlhaloganyang puo ya bone.

Mme Ramaribana a re dikole  tsa ithutelo ditiro le tsone ga di na ditlamelo tsa go ruta ba-na-le bogole, ka jalo seemo se se ba tima sebaka sa go tsweledisa kana go ithuta sepe se ba se eletsang.

A re bokopano jwa mofuta o, bo tlaa thusa go arogana maele ka maikaelelo a go tokafatsa ditlamelo tsa thuto go lebeletswe go akaretsa ba-na-le bogole.

O supile fa go na le thulaganyo ya go thusa gore bana bao ba bone thuso e e tshwanetseng.

Mme Ramaribana a re go tshwaragana le makalana a mangwe go ntshitse maduo ka jaana ba kgonne go isa batlhoka kutlo go tsena sekole sa tiro ya diatla kwa Afrika Borwa.

Le fa go ntse jalo, Mme Ramaribana a re go botlhokwa gore makalana ka go farologana ba ithute puo e e dirisiwang ke ba ba senang puo le kutlo.

O tlhalositse gore go tlhoka go itse puo ya diatla go dira gore ba-tlhoka kutlo ba palelwe ke go ikuela fa ba na le mathata mme seemo seo se dire gore ba tsenwe ke boitlhobogo.

Modulasetilo wa lekalana la ba-na-le bogole mo Shoshong, Mme Oakantse Kanokang o supile fa ba faraferwe ke dikgwetlho.

A re bana bangwe ba ba nang le bogole ba tlogelwa ba le nosi ba sena tlhokomelo, jaaka batlhokomedi ba bone ba kgarakgatshega go batla mafulo a matalana.

A re o tshwentswe ke tlhaelo ya barutabana ba ba nang le kitso ya go ruta baithuti ba ba nang le bogole.

E rile a ntsha molaetsa ka thuso ya moranodi, monana wa motlhoka kutlo, Rre Edwin Mabotle go tswa Gantsi, a re o kopanye le bogole a le dingwaga di supa.

O supa gore o bonye thuso ya go tsweledisa dithuto kwa Ramotswa kwa go nang le barutabana ba ba rutetsweng go ruta ba-tlhoka kutlo.

Rre Mabotle a re o bone mosola wa thuto ka e bile a kgona go thusa mo go ruteng ba-na-le bogole ba bangwe.

O kopile batlhokomedi ba ba-na-le bogole gore ba seka ba tlhajwa ke ditlhong ba ba ntshetse mo pontsheng le go ba fa sebaka sa go ithuta.

A re go dira jalo go tlaa neela ba-na-le bogole sebaka sa go ipetlela isago e e lakaselang.

Fa a tswa la gagwe, modulasetilo wa komiti ya thuto le botsogo mo khanseleng-potlana ya Mahalapye, mokhanselara Nametso Koma o ne a gatelela botlhokwa jwa go ruta setshaba ka ditlamelo tsa ba-na-le bogole.

Le fa ditlamelo tsa ba-na-le bogole di santse di tlhaela, Rre Koma a re maiteko a a dirwa go di tokafatsa.

O supile gore sengwe sa tse di ka pakang seemo se, ke go bona barutabana ba ba rutetsweng go ruta ba-na-le bogole ba ntse ba oketsega. Bokhutlo