28 Mar 2019

Seemo sa tlhaelo ya metsi ke kgwetlho kwa dikgaolong tse di okametsweng ke khansele ya Borwa. 

E ne ya re a akgela mo molaetseng wa modulasetilo wa khansele ya Borwa bosheng, mokhanselara wa kgaolo ya Ralekgetho, Rre Omphile Motlhajoe, a re banni ba Ralekgetho le Pitseng ba tlhasetswe ke lenyora.

A re se se tla morago ga gore sediba sa Ralekgetho se tseelwe motshine oo pompang metsi. 

Le fa go ntse jalo a re metse ya Pitseng le Ralekgetho e ne e ntse e tshelelwa metsi fela sentle ka dikoloi tsa metsi, mme ga go sa tlhole go diragala jalo. 

Rre Motlhajoe a re mo khanseleng e e fitileng,  lephata la metsi le ne le rile le tlaa romela setlhopha go ya go sekaseka gore a metsi a teng. 

O supile gore banni ba metse e mene e e bopang Ralekgtho ba ntse ba a nwa mo letamong le le bidiwang Zambia le mo nakong eno le kgalang.

Fa a tswa la gagwe ka selelo sa lenyora kwa Madingwane, mokhanselara wa kgaolo ya Ramatlabama, Rre Boniface Leshomo, o ne a bolela fa pompo ya motse oo e senyegile , mme banni ba iphema lenyora ka go ga metsi a letamo.

A tlatsa ka gore mo gompienong letamo leo le a kgala. 

Mokhanselara wa kgaolo ya Mokhomma, Rre Kebotlotlile Mothobiso, a re ga gona sediba sa baikopanyi kwa motseng wa Mokhomma. 

A re o kopa gore banni ba phunyediwe sediba ka gore didiba tse di leng teng ke tsa batho ba ba ikemetseng. 

A re beng ba didiba tse di ikemetseng ba lopa ditlhwatlhwa tse di kwa godimo tsa dituelo mo e felelang batho ba nosetsa mo malwapeng a bone. 

Mokhanselara wa kgaolo ya Kebuang, Mme Kopano Pasela, a re fa e sale Sedimonthole ngogola ga ba bone metsi. 

A re ere le ntswa ba lephata la metsi ba ne ba ka ba thusa ka metsi kgaolo ya gagwe e a tlhatloga gape e matlapa, ka jalo o ikopela mo ba ditsela go baakanya seemo se. Mokhanselara wa kgaolo ya Marapalalo , Rre Kabelo Lemme a re le fa ba lela ka metsi, ba boleletswe gore tanka e e ko Ntsweng ga e sa tlhole ele mo tirisong.

Fela a re o tshwenngwa ke gore ba lephata la metsi ba tlhokomologile tanka ya bone. 

Kopo ya gagwe ke gore ba lephata la metsi ba bolele maikaelelo a bone ka tanka e ka gore e fetogile lefelo la borukutlhi. 

Mokhanselara wa kgaolo ya Maokane Mme Tshupontle Kgetsi are o lebogela gore ebe seemo sa tlhaelo ya metsi ko motseng wa Maokane se tsibogetswe ka go agelwa sediba.  Bokhutlo