24 Mar 2019

Tautona Dr Mokgweetsi Masisi o kgothaditse magolegwa a bomme gore a seka a latlhegelwa ke tshepo ka jaana botshelo jwa bone bo sa felela mo kgolegelong. 

O buile jalo fa a etetse kgolegelo mo Gaborone bosheng.

Dr Masisi a re bomme ba ka dirisa sebaka sa kwa kgolegelong go ithuta ka mananeo a ba ka a dirisang go itlhabolola. 

O ne a ba kgothatsa gore ka tshepo le tsholofelo ba tlaa boela kwa setshabeng e le batho ba ba ikanyegang mme ba amogelesege.

Tautona o ne gape a lekola magolegwa a borre, mme le bone fela jalo a ba kgothatsa. 

O ne a ba gakolola gore ba itshware sentle le go nna le maitseo a nametsang.  

Dr Masisi o ne gape a ba netefaletsa gore puso ga ya ba lebala ka gore ba mo kgolegelong, mme a re ba dirise sebaka se go itharabologelwa le go ikaga.

Mo go tse dingwe, Dr Masisi o boletse fa puso e itse ebile e lemoga seemo sa dikgolegelo. 

A re e lemoga gore dikago di dikgologolo ebile gape go mosuke mo dikgolegelong, mme a re puso ga e a nna moriti o tsididi ka kgang ya teng.

E rile a leboga Tautona, modiri wa kgolegelo Mme Lesego Dijogadifele a re ba itumeletse leeto la ga Tautona ebile a tshepisa gore batla tswelela ba bereka ka bonatla, boikobo le boingotlo. Bokhutlo