19 Mar 2019

Banana ba dikereke tse di farologanyeng kwa Palapye ba rotloeditswe go itlhatlhobela mogare wa HIV ga mmogo le go thusa go lwantsha kanamo ya one. 

Thotloetso eo e ntshitswe ke Kgosi Masego Olebile wa Palapye kwa pitsong ya banana ba dikereke bosheng, e maikaelelo a yone e neng e le go ruta le go tsibosa banana ka HIV. 

Kgosi Olebile a re banana ba dikereke ba tshwanetse go di goga kwa pele mo ntweng kgatlhanong le HIV. 

A re ba tshwanetse go nna sekao fa go tla mo dikgannyeng tsa go itlhatlhotlhobela HIV, selo se a kaileng fa se ka rotloetsa banana ba bangwe go itlhatlhoba. 

A re puso e ntshitse mananeo le go tlhoma makalana a a itebegantseng le go lwantsha HIV, a tshwana le go tlhopha Mopitlwe go nna kgwedi ya banana kgatlhanong le HIV/AIDS.

O kaile fa Palapye e le mongwe wa metse e banana ba yone ba amilweng ke HIV/AIDS ka dipalo tse di kwa godimo, ka jalo a kopa banana ba dikereke go tshwaragana le maphata a puso le a a ikemetseng a a itebagantseng le go lwantsha HIV/AIDS. 

Fa a tswa la gagwe, mokwaledi wa lekgotla la baruti mo Palapye, Rre Mosupi Kelesitswe a re boeteledipele jwa dikereke bo tshwanetse go rotloetsa banana mo dikerekeng tsa bone go itlhatlhobela HIV.

A re kgwedi ya banana kgatlhanong le HIV/AIDS e fa monana mongwe le mongwe sebaka sa go itshekatsheka tebang le dikgang tsa HIV/AIDS, mme e bile e ba gwetlha go tsaya dithuto tse ba di fiwang tsia.

A re ke keletso ya puso gore e re ka 2030, go bo go sa tlhole go na le ba ba tsenweng ke HIV mo bosheng, mme a kaya fa seo se ka kgonega fa dikereke di ka nna le seabe ka go rotloetsa boitshwaro jo bo siameng. 

Rre Kelesitswe a re jaaka HIV e tsweletse ka go ama banana thata, banana ba dikereke ba tshwanetse go supa fa ba na le Modimo mo dipelong tsa bone ka go itlhatlhobela mogare oo gammogo le go itshwara jaaka banana ba ba setseng ditaelo tsa Modimo morago. BOKHUTLO