19 Mar 2019

Kgosi Botshelo Lekgothu wa Ghanzi o kaile fa go le botlhokwa go itse dingwao ka go farologana.

Mo molaetseng wa gagwe wa letsatsi la ngwao la sekole sa ithutelo ditiro sa Ghanzi Brigade bosheng, Kgosi Lekgothu o tlhalositse fa go itse le go tlhaloganya dingwao go ka dira gore merafe e tshele sentle mmogo go sena kgotlhang.

Se a re se ka thusa gore morafe mongwe le mongwe o ikgantshe kgotsa o ipele ka ngwao ya one ka phuthologo.

O ne a  supa fa go le botlhokwa gore morafe mongwe le mongwe o diragatse ngwao ya one, a kgala go kopa dingwao tsa ditshaba di sele, mme batho ba sa tlhaloganye motheo wa tsone.

Kgosi Lekgothu o supile fa go tshwantsha dintswantsho mo mebeleng jaaka digagabi e se ngwao ya Batswana, a tlatsa ka go re dintswantsho tseo di na le bokao  jo bontsi bo sa bo itseng. 

 A re batho ba tshwanetse go itse gore mebele ya bone ke ditempele tsa Modimo, ka jalo ba sa tshwanela  go e fetola kgotsa go e senya ka tsela epe.

O ne a tswelela ka go tlhalosa gore kapari le yone ke bontlha bongwe jwa ngwao, a supa gore go apara mogagolwane go kgethegile, ka e aparwa ke bomme ba ba lailweng ka fa Setswaneng, a tlatsa ka go re gompeino, mme mongwe le mongwe o kgona go apara tsale fela ka gore o na le madi a go e reka.

Kgosi o ne a tlhalosa gore kgotla ke lefelo le le faphegileng, ka jalo le tshwanetse go tlotlwa ka nako tsotlhe.

 O ne a galaletsa sekole seo ka go tsibosa banana ka dingwao tsa lefatshe leno.

Mothusa kgosi wa Ghanzi,  Mme Annah Rankho ene o ne a re  ntswa ngwao e fetoga le dinako, e ntshwanetse ya nna pinagare ya merafe ka go farologana, e bile ba tshwanetse go ipela ka yone.

A re ka ngwao e bopaganya malwapa, e ka dirisiwa go aga setshaba kgotsa lefatshe.

Mokhanselara wa kgaolo, Rre Bojelo David o ne a rotloetsa banana go gata fa borrabomogolo ba gatileng teng.

A re tshaba ya Botswana e tswa kgakala e itsege  ka maitseo.

O ne akgola sekole go dira moletlo wa ngwao.

E rile a amogela baeng, motshwarelala mogokgo wa sekole seo, Rre Serwalo Lesolame a supa fa ba bone go le botlhokwa go boloka  bokamoso jwa lefatshe ka go rulaganya moletlo oo.

 A re ngwao ya lefatshe e tshwanetse go nna mo dipelong tsa morafe, e bile a supa fa go somarela ngwao go sa tshwanela go kgoreletsa dingwao tse dingwe.

Letsatsi leo le ne la natetshiwa ka metshameko ya ngwao ka go farologana. BOKHUTLO