07 Mar 2019

Sekole se segolwane sa Mogale kwa Maokane mo kgaolong ya Ngwaketse Bophirima se nna fela se di goga kwa mogatleng mo maduong a ditlhatlhobo tsa mophato wa boraro.

Se se boletswe ke Kgosi Isaac Banyaditse  mo potsolotsong le BOPA bosheng. 

A re se se dirwa ke batsadi ba ba sa tseeng thuto ya bana ka tlhoafalo e bile ba sa tsene diphuthego.

Kgosi Banyaditse a re le fa ngwana a tswa mo tseleng, batsadi ga ba ke ba tsaya kgato ka jaana ba seke ba leka le fa e le go ikuela kwa baeteleding pele ba motse.

A re bana ba sekole se ba diiwa ke go nna mo dibareng ka mafelo a beke, mme le fa batsadi ba ba bona ga ba ke ba kgalemela.

A re batsadi ba bana ba bone ba tsenang kwa Mogale le fa ba bilediwa ngwana a sa tsoga ga ba ke ba tsiboga, mo go felelang e nna morwalo wa barutabana.

O bile a re se sengwe se se amang maduo ke go tlhoka boroko ga barutabana, a supa fa ba nna mo matlong a a sa siamelang botsogo, ebile a tlhaela.

Kgosi Banyaditse a re barutabana ba tlhaelelwa ke boroko mo bangwe ba bone ba tsogang kwa Jwaneng, mme go le kgakala e bile tsela e sa siama. A re barutabana gape ba ikuela gore bana ba sukagane mo ba felelang ba rutela bangwe ka fa tlase ga ditlhare.

A re sekole se fa se simologa, se ne se tshwanetse go tsaya bana ba le makgolo a marataro, mme se tsaya makgolo a a robang bongwe le masome a mabedi le bobedi.

Kgosi Banyaditse a re ntlwana nngwe le nngwe ya borutelo  kwa sekoleng seo e tsaya bana ba le masome a matlhano le ntswa  e tshwanetse go tsaya masome a mararo le botlhano fa go padile.

O boletse fa go kile ga lekwa ka dikharabene go fokotsa tlhaelo ya matlwana a borutelo, jaanong le tsone di setse di onetse.

Kgosi gape a re setofo se sale se rekilwe palo ya bana e ise e oketsege. A re mo nakong ya gompieno se fekeediwa ke palo ya bana. A re palo eo e pateletsa baapei ba le bone ba leng palo potlana go apaya ga ntsi.

Kgosi Banyaditse a re mathata a mangwe ke letlhoko la metsi kwa motseng oo. A re seemo seo se tle se gomagometse gore bana ba ba  filweng boroko mo sekoleng ba bulelwe.

Sekole seo se amogela bana ba mophato wa ntlha go tswa kwa mafelong a a kgakala le ditlamelo a tshwana le Ralekgetho, Pitseng, Seherelela le Lefoko ka jaana go sena sekole sa magare gaufi. BOKHUTLO