21 Feb 2019

Rre Keolopile Dithatho, yo lentswe la gagwe le neng le tlhagelela thata mo dithulaganyong tsa diromamowa ka go farologana, o tlaa bolokwa kwa Ghanzi ka Matlhatso

Rre Dithatho o tlhokafetse kgwedi eno e le lesome le borataro kwa kokelong e potlana ya Ghanzi morago ga go lwala lebaka le le leele.

E rile Rre Dikitso Kolokose, yo e leng ngwana wa moswi a bua mo potsolotsong, a bolela fa Rre Dithatho a tsenwe ke bolwetse ka ngwaga wa 2017.

Rre Kolokose a re bolwetse bo ne jwa simolola go mo gatelela ngwaga o o fetileng o ya fifing. “Fa e sale ngwaga ono o simolola bolwetse bo bo bo tsaya phekelo e sele go fitlhelela a tlhokafala. 

Rre Dithatho o tshotswe ka 1947 kwa Tshane kwa Kgaolong ya Kgalagadi, mme o ne a ya kwa  Ghanzi ka tiro.

E rile Mme Leinaemang Gaborakanelwe yo e leng mmamalomaagwe Rre Dithatho a bua ka moswi Dithato a tlhalosa fa e ne e le motho yo o ratang batho le go itshetsa ka diatla.

Mme Gaborakanelwe o ne a tlhalosa gape fa moswi e ne e le motho yo o ratang boammaaruri a sa batle dilo tse di sa tlhamalalang.

Mme Edith Nkagisang Gaitote a re Rre Dithatho ke motho yo o neng a ila bojalwa lebaibai.

Mme Gaitote a re morago ga go tlogela tiro ka bogodi Rre Dithatho o ne a inaakanya le temo-thuo go fitlhelela a tlhokafala.

A re sengwe le sengwe sa gagwe o ne a sedirela mo Ghanzi, ka jalo phitlho ya gagwe e tlaa tshwarelwa mo Ghanzi ka Matlhatso.

Moswi o tlogela bana ba roba bobedi; basimane ba le batlhano le basetsana ba le bararo  le bomonnawe ba le babedi. Ends