18 Feb 2019

Batswana ba le bantsi ba tsweletse ka go iphataphatela.

Se se supilwe mo puisanyong bosheng ke Rre Boiki Matlou go tswa Malolwane, yo o tlhalositseng fa a tshwara ditlhapi mo nokeng ya Madikwe go tswa kwa Mmathubukwane go ema kwa Ramonaka.

A re gape o di tshwara mo nokeng ya Limpopo kwa Oliphant Drift le Ramotlabaki.

Rre Matlou o boletse gore lerato la gagwe mo tlhaping le ne la dira gore a simolole go tshwara ditlhapi mo dinokeng tse.

A re o ne a simolola kgwebo ya go tshwara ditlhapi ngwaga tse di lesome morago ga go reka mokoro mo monning mongwe wa Mochudi.

A re ka ditlhapi tse di mo dinokeng tse di se dintsi go le kalo jaaka mo dinokeng tse di tshwanang le tsa Chobe le matamo a matona, o kgona go tshwara ditlhapi mme a di rekisetse batho ka bongwe ka bongwe.

O kaile fa bontsi jwa batho ba di reka ka ditlhwatlhwa tsa gagwe di se kwa godimo.

A re madi a kgona go mo thusa go reka tse a di tlhokang kwa lwapeng, mme se se mo fe kgothatso ya gore a nne a tswelele.

Rre Matlou o tlhalositse fa a na le keletso ya go ka rekisetsa ba dikgwebo mme ka mabaka a gore ga a na ditlamelo tse di siameng gape le gore ditlhapi ga di dintsi thata, maiteko a santse a pala.

O kaile fa nako dingwe fa batho ba tsile go iphokisa phefo fa nokeng, ba tle ba palame mokoro wa gagwe ntleng le dituelo.

A re o na le toro ya go ka tswakanya kgwebo ya gagwe ka go reka mokoro o motona o a ka kgonang go pega batho ba le bantsi, mme a itebagantse le go pega bajanala.

O tlhalositse gore bontsi jwa batho ba simolotse go lemoga fa dinoka tsa Madikwe le Limpopo kwa Oliphants Drift di na le mafelo a a kgatlhang leitlho, ka jalo se se ka mo thusa fela thata.

Mo go tse dingwe, Rre Matlou o boletse fa a na le khamphani e e bidiwang Fish and Veggies e a e tlhamileng dingwaga tse di lesome tse di fetileng.

A re o na le tshingwana ya morogo kwa Ramotlabaki kwa a lemang merogo, mme a e rekisetsa batho ka bongwe ka bongwe.

O kaile fa gantsi a batla badiri ba nakwana go mo thusa mo tshingwaneng, bogolo jang fa go na le tiro e ntsi. Bokhutlo