15 Jan 2019

Go sa boneng thotloetso le mmaraka ga dikgwebo segolo jang tse di potlana go felela go dira gore beng ba dikgwebo ba kgobege marapo. 

Fa go sena thotloetso e dikgwebo di ka ikaegang ka yone, di felela di phutlhama mme seo se dire gore maiteko a bagwebi a folotse.

Mongwe wa bagwebi ba ba lelang ka letlhoko la mmaraka ke Mme Goitsemang Dibere wa Molepolole, yo o dirang kgwebo ya makgabisa a Setswanajaaka megopo le di nkgwana ka go dirisa pampiri le dipeo tsa ditlhare. Mo puisanyong  bosheng, Mme Dibere o tlhalositse fa go tlhoka thotloetso le mmaraka go baya kgwebo ya gagwe ka fa mosing.

A re mo nakong eno, kgwebo ya gagwe ee nang le ngwaga di le nne, e sa ntse e sokola ka ga ise e fitlhe fa a batlang e ka nna teng mme a gatelela fa a batla go bona kgwebo ya gagwe e godile e bile e na le mmaraka oo kgotsofatsang.

Le fa go ntse jalo, Mme Dibere o supile fa a sa ipone tsapa ka go nna a ipapatsa mo motseng, ka jaana go santse go le thata gore a bone bareki.

 O tsweletse a supa gore o kgona go tsena dikgaisanyo tsa bagwebi e le tsela nngwe ya go ipapatsa mme a gatelela fa di mo thusa thata ka jaana a kgonne go fenya  a ba a atswiwa ka lemmenyana le a kaileng fa le kgona go mo isa golo gongwe. 

O gateletse gore, e re le ntswa a lebanwe ke dikgwetlho,  go motlhofo go bona didirisiwa tsotlhe tse di tlhokang go dira dithoto tsa gagwe.

Mme Dibere a re gantsi o tsamaya a sela di pampiri go di busetsa mo tirong le go phepafatsa tikologo.

O tlhalositse fa gantsi dipeo tsa ditlhare tsone di bonala mo di jarateng mme a kaya fa nako e ntsi fa a bona peo e a e tlhokang o tsena mo lwapeng leo go kopa tiro ya go feela ka maikaelelo a go kgobokanya dipeo tseo.

A re tiro eo, o e simolotse morago ga gore a bone mme mongwe a dira tiro ya mofuta oo mme a nna le kgatlhego ya go ka e dira gore a kgone go itshetsa ka yone.  BOPKHUTLO