15 Jan 2019

Seboko sa Phane, se se bonwang ka Mopitlo  le Sedimontlhole, se tlodisa ba le bantsi melatswana.

Mo potsolotsong bosheng, Mme Therezi Aron wa dingwga tse di masome a mane le bosupa o tlhalositse fa a na le dingwaga di ka feta lesome a ntse a bapala phane.

Mme Aron wa kwa Sekokwe a re phane e mo tlodisitse melatswana e le mentsi e bile o santse a tlaa a tswelela a ithusa ka yone.

A re ene ga a nke a ipona tsapa go e tshwara e bile ga a nke a tshwenngwa ke gore diatla tsa gagwe di tlaa tlhabiwa ke mmitlwa.

O tlhalositse fa a tsentse bana ba gagwe dikole ka go rekisa phane, a kgonne go tsenya motlakase, a bo a reka ditonki tse pedi tse a lemang ka tsone.

O ne a kopa ba ba nang le kgatlhego ya go bapala phane go seke ba ipona tsapa.

A re ene ga a je phane mme bana ba gagwe ba a e ja  ka jalo fa a e bapala o itse gore ga ba na go lala ka tlala e bile leene o tlaa oba letsogo.

O ne a lebogela puso go dira molao wa diteseletso tsa go bapala phane, a tlatsa ka gore batho bangwe ba ne ba setse ba koba seboko sa phane ka go e bapala  e sale nnye golo mo a reng go  nyeletsa peo ya yone.

Le fa go ntse jalo, Mme Aron a re mono ngwaga ga a e tshwara e le ntsi ka a simolotse nako e setse e ile.

O ne a rotloetsa batshwari ba phane gore go botlhokwa gore ba sale molao wa go dira tetla ya go tshwara phane go itsa go gotlhagotlhana le molao.

A re ene o e bapala ka phuthologo ka go bo a na le teseletso, a tlhalosa fa go sa thuse gore motho a nne a tshogile mo sekgweng ka a roba molao.

Mme Dipolelo Tshwene ene o tlhalositse fa e le mongwe wa ba ba godisitsweng ka dipoelo tsa phane, mme mo nakong eno le ene a itshetsa ka go e bapala.

Mme Ditshwene a re boleng jwa yone bo botlhokwa fela thata, ka fa a e bapetswe sentle o kgona go rekisa mme gape ba e je mo lwapeng.

E re le ntswa seboko se, se se sentsi mo mafelong ka bontsi, a re ba ne ba ipopa  setlhopha kwa Sekokwe go e  latela kwa masimong a Moletemane kwa kgaolong ya Bobirwa.

O tlhalositse gore le fa ba e latela kgakala le kwa ba nnang teng, dikgwetlho ga di nke di tlhokega, a tlhalosa fa letlhoko la pula e le lone sekgoreletsi.

 O ne a tlhalosa gore phane e na le tiro e ntsi, ka jalo fa pula e nna ntsi ba setse ba se bapetse se gana go oma mme se a bola ka se tlhoka le letsatsi le le ntsi.

A re le ntswa bangwe ba kgona go ja phane e sena go apewa, go botlhokwa thata gore e omisiwe gore e jewe ka lebaka.

Mme Gosaitse Ellias ene o tlhalositse gore e ne e le lantlha a ya go bapala phane.

O tlhalositse fa lephata la diphologolo le ntsha diteseletso nako e setse e ile mme se se ba baya ka fa mosing.

O tlhalositse fa phane e ba thusa thata ka e bile ele bogadi bogaufi ka e se botlhe ba ba e e jang ba ba kgonang go e bapala.

A re le fa e tla gabedi mo ngwageng, e botlhokwa ka e sa kganele motho gore o ka bereka ditiro tse dingwe tsa gagwe.

Rre Boyce Kesentseng wa dingwaga tse di masome a mararo le borataro a re phane e mo namola thata, ka ene a bereka go isa ditlhopha tsa batho kwa  ba a bong ba e latela teng ka koloi ya gagwe.

Rre Kesentseng o tlhalosiste fa gole gantsi a duedisa ka yone phane mo boemong jwa madi gore le ene a tle a ithekisetse ka dipoelo tsa teng di nna botoka.

A re mono ngwaga o ne a nna le lesego le le ntsi ka a ne a kgona go rekisa  diphoisane tsa dilithara tse di masome mabedi kwa baruing ba dikgomo kwa Aferika Borwa.

O tlhalositse fa barui ba dikgomo ba tlhalosa fa ba e rekela go e jesa dikgomo tsa bone ka jaana ba dumela gore se na le dikotla, a re ba tlhalosa fa ba se sila  a bo di ja ele moroko ba kopantse le metswako e mengwe ya bone. BOKHUTLO