14 Jan 2019

Komiti ya ditlhabololo tsa Shoshong e tsweletse ka thulaganyo ya go tsosolosa tshingwana ya merogo ya Eden.

Morafe o ntshitse P100 000 go tswa mo letloleng la madi a a abelwang dikgaolo tsa botlhophi go dira ditiro tse ba bonang di le botlhokwa mme di sa akarediwa mo mananeong a ditlhabololo.

E rile a rola pego ya komiti ya ditlhabololo tsa motse oo mo phuthegong ya kgotla e neng e biditswe ke mopalamente wa kgaolo eo, Rre Dikgang Makgalemele, modulasetilo Rre Molatedi Kenabatho o ne a supa fa tiro ya go rudisa tshingwana ya morafe ya merogo ya Eden e tsweletse sentle.

Rre Kenabatho a re lekgotla la kabo ditsha le mo thulaganyong ya go baakanya peo ya tshingwana eo, ba a fetolela mo tsamaisong ya segompieno go tswa mo go ya bogologolo ee neng e dirilwe ke dikgosi.

O tsweletse a tlhalosa gore madi a P100 000 a tla dirisiwa go agelelwa tshingwana, go gokela le go dira moalo wa phatlalatso ya metsi.

Modulasetilo, Rre Kenabatho a re dingwe tse di tlaa dirwang mo tshingwaneng ya Eden ke temo ya merogo, ditlhare tsa maungo, thuo ya dihutshane le tse dingwe tse ba bonang di ka nna botlhokwa mo go tswakanyeng itsholelo ya motse.

A re mme tse tsotlhe maikaelelo a tsone ke go tlhama ditiro le go fokotsa lehuma.

Rre Kenabatho a re se se botlhokwa segolo bogolo ke go rotloetsa mowa wa boipelego ka gore tshingwana e tlaa rotloetsa morafe go itirela mananeo a itshetso le tlhabololo matshelo.

A re komiti ya ditlhabololo kwa Shoshong e lemogile gape gore batho bangwe ba ba neng ba diretswe tshingwana tsa merogo mo malwapeng ka lenaneo la nyeletso lehuma ba sa kgona go tswelela ka mabaka a dikgwetlho tse di farologanyeng.

“Maikaelelo a rona ke go ba phutha gore ba kgone go tsweledisa maikaelelo a bone a go lema merogo, ba dirisa tshingwana ya morafe ya Eden.”

E rile a tsibogela pego ya komiti ya ditlhabololo, Rre Makgalemele yo gape eleng mothusa tona mo lephateng la tlhabololo banana, metshameko le kgodiso ngwao, a gatelela botlhokwa jwa go tswa ka maano aa ka thusang go tlhabolola itsholelo ya motse.

 “Ke le rotloetsa le le VDC go tswa ka megopolo e ka nowang moro ke morafe,” ga tlhalosa Rre Makgalemele.

“A re emeng ka dinao go tlhabolola tshingwana e, ka gore e kare tlodisa dinoka di tletse.”

A re komiti ya ditlhabololo le morafe ka kakaretso ba tswe ka maele a ka thusang puso go dira ditiro, ba dira ka mowa wa boipelego go tlhabolola motse.

“Mogopolo wa maloba wa boipelego wa motho le motho e ne ele mowa wa boipelego o ka rotloetsang go itirela le go atolosa itsholelo.”

Rre Makgalemele a re go botlhokwa gore madi a seka a dirisiwa mo ditirong tsa ditlhabololo jaaka dikago fela, mme a tshwanetse a tsenngwa mo ditirong dingwe tse di ka thusang go lwantsha dikgwetlho tse di apesitseng setshaba kobo ka letshoba jaaka letlhoko la ditiro le lehuma. BOKHUTLO