02 Dec 2018

Badiri ba Khansele-potlana ya Letlhakeng ba kopane le ba lephata la makgotla a Setswana ba abetswe dietsele tsa go dira ka botswapelo.

Fa a amogela baeng kwa modirong oo, modulasetilo wa khansele-potlana ya Letlhakeng, e bile e le mokhanselara wa Takatokwane/Dutlwe, Rre Tlotlo Batlhophi, o ne a kopa ba ba sa tsayang dietsele gore ba  seka ba akanya gore ba latlhetswe kgakala.

Modulasetilo o ne a kopa gore jaaka khansele e kopanetse go aba dietsele le ba makgotla a Setswana, ba tshwaraganele ruri le ka ditirelo.

Mothusa mokwaledi wa khansele-potlana ya Letlhakeng, Rre Tumelo Seboko o ne a tlhalosa fa maikaelelo a tiro eo e ne e le go lemoga bokgabane jwa badiri, a supa fa puso e ne ya tsaya tshwetso ya gore go nne go lemogwa ba ba dirileng sentle ka go ba fa dietsele le ditlankana.

Rre Seboko o ne a akgola ba ba filweng dietsele, a ba kopa go tswelela ba dira tiro e ntle, mme a kopa ba ba sa bonang sepe go ititaya ka thupana gore le bone ba bone sengwe ngwaga o o tlang.

Mogolwane wa khamphani ya Ecsponent Asset Management, Rre Joseph Mosimane, a re dipatlisiso di supa fa go lemoga badiri go tsisa maduo mo tirong.

Rre Mosimane o supile gore fa babereki ba sa bereke ka lenaneo ba kgona go palelwa ke tiro, mme fa ba bereka ka lenaneo sengwe le sengwe se tsamaya ka thelelo.

O tlhalositse fa kgaolo-potlana ya Letlhakeng e na le dikgwetlho tse dintsi jaaka go tlhaelelwa ke didirisiwa, mme a ba lemotsha fa puso e ba file boikarabelo jwa gore ba fe Batswana le ba ba kgakala le ditlamelo ditirelo.

O ba rotloeditse go ithotloetsa, a bo a ba kopa go ipotsa gore ba diretse eng khansele e seng gore khansele e ba diretse eng.

Fa a itebaganya le bagolwane, Rre Mosimane o ba kopile go kopanela ditogamaano pele le ba ba ba eteletseng pele.

O tlhalositse fa go le botlhokwa go arogana tebelopele le maikaelelo le baba berekang le bone, a supa fa se se ka tokafatsa maduo.

O boletse gape fa go lemoga makoa a ba bangwe go le botlhokwa ka go ka dira gore ba bereke ba itsane.

Seetsele sa modiri yo o ba gaisitseng botlhe se ne sa gapiwa ke Tshireletso Ofentse kwa lephateng la makgotla a Setswana, fa kwa khanseleng se ne sa gapiwa ke Tumi Badiseng.

Tlotla e e fiwang ke mokwaledi wa khansele-potlana e ne ya gapiwa ke Fredrick Janson, a ikgapela setlankana le P1 000. BOKHUTLO