17 Oct 2018

Tona wa lephatata la peeletso, papadi le madirelo, Mme Bogolo Kenewendo o rotloeditse baithuti ba sekole se segolwane sa Motopi go tsaya thuto ka tlhoafalo.

Tona Kenewendo o ntshitse kgakololo e kwa moletlong wa go rola mpho ya Botswana Stock Exchange ya motshine o o ntsifatsang dipampiri kwa Motopi bosheng.

Mme Kenewendo a re thuto e tshwanetse ya emelwa ka dinao mme e seka ya busediswa morago ke letlhoko la didirisiwa.

O boletse fa a tlaa tswelela a kopela sekole sa Motopi dithuso mo go tsotlhe tse ba di tlhokang ka jaana se na le letlhoko le le tona.

A re sekole sa Motopi se tsaya bana ba metse e le metlhano e e akaretsang Moreomaoto, Khumaga, Phuduhudu, Mababe, Khwee mme se se bake letlhoko le kwa matlong a boroko jwa bana.

Tona o lebogile Botswana Stock Exchange go bo e rile a itela mo go bone ka letlhoko la sekole sa Motopi ba mo reetsa.

Mme Kenewendo o lebogetse gape le barutabana tiro e ntle e ba e dirang le ntswa ba lebanwe ke dikgwetlho.

O rotloeditse bana go itekodisa mogokgo gore ba eletsa go dirwa jang kana ba tlhaela fa kae a bo a ba lebogela maduo a mogokgo a tlhalositseng fa a tokafetse.

A re mogokgo o supile gape fa ba dira sentle mo dithutong e bile ba fenya dikgaisano tsa thuto ka go farologana.

Tona o ne a gwetlha ba-na-le seabe go thusa puso ka e tlhaelelwa ke madi, a kopa batsadi go boela mokgwa wa bogologolo wa boipelego go thusa puso.

Mme Kenewendo o rotloeditse ba ba dingwaga di lesome le boferabobedi le go feta go ikwadisetsa ditlhopho tsa setshaba tsa ngwaga o o tlang.

Moeteledipele wa Botswana Stock Exchange, Rre Thapelo Tsheole o boletse fa maikaelelo a bone e le go tsenya letsogo mo thutong ya lefatshe leno.

Rre Tsheole o kgothaditse baithuti go tlhoafalela thuto, a re ba tsee malebela mo go ene le tona.

A re le bone ba tsene dikole tsone tse ba di tsenang.

A re ba tlaa tswelela ba thusa sekole fa motshine o ka senyega kana o feletswe ke didirisiwa, a tlatsa ka go re ba tlaa tsweledisa botsalano go ya pele fa maduo a bonala.

Mogokgo wa sekole sa Motopi, Mme Victorious Gogannekgosi o tlhalositse fa maduo a sekole a tokafetse mme e bile ba ikaelela go tswelela ba a godisa.

Mme Gogannekgosi a re o solofela gore ba tlaa kgona maikaelelo a bone ka jaana baithuti ba sekole sa gagwe ba itshwara sentle le barutabana ba na le lorato mo baithuting.

A re motshine o tlaa tsisa pharologanyo mo tirong ya bone ka jaana ba ne ba kgona go tlhoka kwa ba ntsifatsang dipampiri teng kana ba tsamaya sekgala go ya go kopa thuso. BOKHUTLO