04 Oct 2018

Dikomiti tsa ditlhabololo tsa metse ya Mosweu, Mokokwana le Maunatlala di lela ka bahirisi ba ba bonya go duela matlo a boroko. 

Badula ditilo ba dikomiti tse, ba ntshitse matshwenyego mo potsolotsong bosheng.

Ba tlhalositse fa ba kolotiwa diketekete tsa dipula, selo se ba reng se phirimisa ditoro tsa bone tsa go ka tsweledisa ditiro tsa ditlhabololo tsa metse ya bone.

 Ba tlhalosa fa go hirisa matlo e le nngwe ya ditsela tsa go dira madi aa thusang mo ditirong tsa ditlhabololo.

Modulasetilo wa komiti ya Mosweu, Rre John Modipe, o boletse fa ba na le matlo a boroko a roba-bobedi le a le mane a e leng marekisetso. A re sekoloto sotlhe sa matlo a go tsweng kwa ngwageng wa 2014 se feta dipula tsa dikete tse di lesome le motso.

Rre Modipe o boletse fa bontsi jwa dikoloto tse bo dirwa ke beng gae, selo se a reng se ngomola pelo le gofeta ka a re ke bone ba tshwanetseng go nna sekao sa tse di molemo.  O boletse fa sekoloto se, se ba ketefaletsa go tlhabolola matlo a mangwe.

Kwa Maunatlala gone, go kolotiwa dikete tsa dipula di le supa go tsweng kwa ngwageng wa 2016 mme maiteko a go phutlha dikoloto ga a tswe dipe.

 Motshwara madi wa komiti eo, Mme Maipelo Medupi, o boletse fa bontsi jwa ba ba kolotang ele badirela puso bangwe ba ba direlang kwa motseng oo.

 O tlhalositse fa ba na le matlo a boroko a le masome a mabedi le boroba bongwe.

A re maikemisetso a bone ke go lwantsha letlhoko la boroko segolo jang mo badirela pusong ba ba tswang kwa ntle, mme jaanong sebe sa phiri ke gore badirela puso bangwe ba moriti o tsididi ka dituelo.

 Mme Medupi o boletse fa mo bogompienong ba kgonne go ntshafatsa matlo a bone ka madi a ditlhabololo a a kgaoganngwang ka metsana mme ba sa kgona go a feleletsa bakeng la tlhaelo ya madi.

Mokhanselara wa Maunatlala, Mme Salome Lesolo, le ene o supile fa dikoloto tse, e le poelo morago mo go tsa ditlhabololo.

Mokhanselara o ne a akgola maitlamo a komiti a go tlhabolola metse. A re kemo nokeng ya banni ba metse eo, e e ka dira gore setshaba le komiti ya ditlhabololo ba nne le neelano ya merero ya ditiro tsa ditlhabololo.

Mme Lesole o kopile dikomiti gore di seka tsa letlelela gore madi a phiriso a kokotlegele ka a re madi a a lopiwang ka kgwedi ke a eseng a sepe mme fa motho a ka a leseletsa sekoloto sa teng se ka felela se mo ketefalela. BOKHUTLO