04 Oct 2018

Mme Kesegofetse Malete go tswa a kwa Malete Attorneys a re baithuti ga ba a tshwanela  go itewa tsebe ke dikgwetlho tse di akaretsang  go nna kgakala le sekole ka di ka ama maduo a bone.

A re moithuti o tshwanetse go tshwara ka thata gore sekgoreletsi se a nang le sone seo a se fenye gore a kgone go fenya dithuto tsa gagwe.

O ne a fa sekai ka ene a re o simolotse sekole sa gagwe se sebotlana a tsena  kwa motseng wa Seolwane a nna le mmaagwe kwa masimo mme a felela a fenya lekwalo la gagwe la bosupa.

A re masimo ao a ne a le kgakala mme ka a ne a ikiteile sehuba, o ne a kgona go fenya dithuto tsa gagwe.

O ne a bua jalo bosheng kwa Seolwane kwa sekole se sebotlana sa Seolwane se neng se ipelela phenyo ya maduo a lekwalo la bosupa a ngwaga  e e fetileng a 92.1 per cent.

Mme Malete o ne a gwetlha baithuti ba sekole seo go simolola kwa sekoleng se sebotlana go tlhwaafalela dithuto tsa bone gore ba seka ba siiwa ke nako mme ba fitlhelele ditoro tsa bone.

A re go a tshwenya go bona baithuti fa ba le kwa dikoleng tse di potlana ba itshwara sentle mme ere ba tswelela le dithuto tse di latelang ba bo ba tswa mo tseleng.

O ne a phophotha barutabana ba sekole seo magetla a bolela fa maduo a sekole a supa fa ba beile baithuti mo dipelong tsa bone mme ba tswelele ka go ntsha maduo a a kgatlhisang.

Ka jalo, Mme Malete o ne a solofetsa sekole seo gore o tla a se thusa ka didirisiwa tsa sekole tse di tlhokafalang jaaka dibuka le dingwe tse ba ka supang fa ba di tlhoka.  

Mogokgo wa sekole sa Seolwane, Rre Gilbert George, o ne a rotloetsa baithuti ba sekole sa gagwe go nna le ditoro ka botshelo jwa bone. A re ditoro tse di molemo tsa baithuti di ka bonwa fela fa ba ka tlhagafalela dithuto.

Rre George o ne a kopa batsadi go rotloetsa baithuti go nna le nako ya go bala fa ba tswa sekoleng ka se se ka dira pharologanyo mo dithutong tsa bone.

A re le ntswa sekole sa gagwe se na le dikgwetlho, bodiredi jwa sekole seo bo dira ka natla go ntsha maduo a a eletswang ke setshaba. A re dikago tsa sekole sa gagwe di a tlhaela ka jalo go tlhokafala gore ba agelwe ofisi le matlo a borutelo.

O tlhalositse fa e rile ka ngwaga wa 2013 sekole seo sa dira matshwao a 77 per cent, ka ngwaga wa 2014 sa dira maduo a 73.2 per cent mme ka 2015 sa ntsha maduo a 80 per cent.

A re ka 2016 ba ne ba ntsha maduo a 84.1 fa e rile ka 2017 ba ntsha maduo a 92.1 per cent.

O ne a ntsha matshwenyego a gore kwa dikoleng tse di kwa tlase bana ba dira sentle mme fa ba tsena kwa dikoleng tse dikgolwane ba bo ba sa dire sentle.

Ka jalo o ne a rotloetsa baithuti bao ba ba setseng ba le mo lekwalong la ntlha kwa sekoleng se segolwane go tlhwaafalela dithuto tsa bone gore ba dire sentle kwa lekwalong la boraro. BOKHUTLO