17 Oct 2017

Borre ba gakolotswe go tsaya karolo ka mo dithutong tsa bana ba bone e seng go baya morwalo otlhe fela mo go bomme, bogolo jang go ya go sekaseka ditiro tsa bana mo dikoleng le go tsenelela  diphuthego tsa batsadi le barutabana (PTA) tse di tshwarwang mo dikoleng.

Mafoko a builwe ke mogolwane go tswa mo lephateng la thuto mo kgaolong ya Kgalagadi,  Rre Gaolatlhe Segone mo letsatsing la  tsamaya  sentle la  bana ba lokwalo  lwa   bosupa kwa sekoleng se sebotlana sa Nhake mo Tsabong.

Rre Segone o ne a gwetlha borre go ema ka dinao go tshwaraganela bana ka go ba aga go simologa fela  kwa lwapeng ba sa ntse ba le bannye  ka go ba ruta botho le maitseo ka e le tsone konokono mo phokotsegong ya  botlhoka tsebe jo bo felelang bo diragala mo dikoleng, a kaya fa ‘lore lo ojwa lo sa le metsi’.

O ne a gakolola batsadi go godisetsa bana mo  lefokong la Modimo ka poifo Modimo ka e le yone tshimologo ya botlhale le gone go ba godisetsa mo tikolong e e siameng go tila go ka raelesega ka go inaakanya le tse di ka ba kgoreletsang mo dithutong tsa bone  jaaka go inaakanya le tsa  marato, bojalwa, ditagi  le tse dingwe.

Mo mafokong a gagwe a kgothatso, sebui sa tlotla sa letsatsi leo, moruti wa kereke ya Sabata e bile e le mogwebi mo Tsabong, Rre Stephen Phiri o gakolotse bana go tlhopha ditsala tsa bone tsa nnete  tse di ka ba fang dikgakololo tse di maleba  le gone go ba  kaela tsela e e ka ba solegelang molemo mo dithutong tsa bone go ya pele mo isagong.

Rre Phiri o boletse fa gape batsadi ba tshwanelwa ke go tsaya boikarabelo mo go tlhomamiseng  gore ba bopa bana,  go kaela  le  go ruta  bana matswakabele a botshelo gore ba tle ba kgone go fitlhelela ditoro tsa bone mo botshelong le gone go ba ruta go ikanya Modimo  ka nako tsotlhe, a gatelela thata gore ba itshwarelele ka mafoko a setlhogo sa letsatsi leo sa Ke Na Le Wena Ka Nako Tsotlhe”

O ne a gakolola  bana ba lokwalo lwa bosupa ba Nhake gore  go fetsa lokwalo lwa bosupa ga go reye gore ba setse ba godile mme ba itse gore ba simolola loeto lo longwe lwa go ya go ithuta kwa dikoleng tse dikgolwane,  le  tse dingwe tsa  ithutelo ditiro, a tlatsa ka go ba kopa go tswelela ba itshwara ka maitseo  ka ba ya go kopana le batho ba ba farologanyeng kwa  ba yang teng.

Mogokgo wa sekole se sebotlana sa Tsabong, Mme Dynah Basutli fa a laya bana o ne a a kopa go itshekatsheka pele ga ba ya go simolola mophato wa ntlha ngwaga oo tlang ka go ipaakanyetsa le go emelelana le dikgwetlho tsotlhe tse ba kopang le tsone ka ba setse ba ruthuntshitswe le go baakanngwa  ditlhaloganyo ke barutabana mo ngwageng tse supa tse di fetileng.

Mme Basutli o ba boleletse fa go le mo maruding a bone gore tsela ba tsaya efe.

A e e yang timelong kana botshelong?

O ba kopile go itisa ka nako tsotlhe le go  ikgapha mo dilong tse di maswe tsa go inaakanya le tsa marato ba sa ntse ba le bannye ka seo se ka ba senyetsa botshelo le bokamoso.

Go le pele fa a kgothatsa le go segofatsa letsatsi leo, Moruti wa kereke ya Apostolic Faith Mission, Moruti Obakeng  Baumake o ne a tlhalosetsa bana fa botshelo jwa bogologolo le jwa gompieno bo le pharologanyo.

Moruti Bumake o ne a kaya fa bana ba sekole bogologolo ba ne ba ralala dikgwetlho tse di farologanyeng di akaretsa go tsena sekole ba tsamaya sekgala se seleele, tlhaelo ya matlo a borutelo le  barutabana,  didirisiwa le tse dingwe le gore botshelo bo ne bo le boima ka nako eo. Bokhutlo