18 Jan 2016

Mopalamente wa Tati Bophirima, Rre Biggie Butale, o gateletse botlhokwa jwa gore melao ya lefatshe leno e tlotlwe ke botlhe.

Fa a bua mo phuthegong ya kgotla kwa Jackalas 1 ka Labotlhano, Rre Butale o ne a tlhalosa fa melao e diretswe go sireletsa lefatshe, ka jalo go le botlhokwa gore Batswana ba e tlotle e bile ba seka ba rotloetsa go tlolwa ga yone.

Mopalamente o ne a fetola mafoko a banni bangwe ba motse oo a gore puso e emise go busetsa batswakwa ba ba tseneng mo lefatsheng leno e se ka fa  molaong kwa magabone fa go tlhomamisegile fa ba sa tla ka maikaelelo a go inaakanya le borukutlhi.

O ne a supa fa go letlelela batswakwa ba go nna jalo go tsena le go nna mo lefatsheng le go rata le go kgona e tlaa bo e le go ithala ka thipa mpeng ka jaana go tlaa seke go nne bonolo go tlhomamisa gore mo go bone ke ofe yo o tlaa felelang a amegile mo borukutlhing.

E ne e rile a lekodisa mopalamente ka tsa ditlhabololo tsa motse, modulasetilo wa komiti ya ditlhabololo tsa motse oo, Rre Obert Sechele, a supa fa go busediwa gae ga batswakwa ba ba tseneng mono e se ka fa molaong e le tshenyo ya diketekete tsa madi a puso.

Rre Sechele o ne a supa fa go ngomola pelo go bo puso e dirisa madi a a seng kana ka sepe go dira jalo, mme e re mo nakong e khutshwanyane batho bao ba bo ba setse ba boetse mono gape.

A re mo boemong jwa go ba rwala ka ditshenyegelo tsa puso go ba busetsa kwa mafatsheng a bone, bao ba ba tshwerweng ba dira ditiro tsa borukutlhi ba tshwanetse ba dirisiwa ditiro tse di ka solegelang lefatshe leno molemo jaaka go dira mo dipolaseng tsa puso e le kotlhao.

Go sale foo, Rre Sechele o ne a tlhalosa fa seemo sa metsi kwa Jackalas 1 se tokafetse.

Le fa go ntse jalo, o ne a tlhalosetsa Rre Butale fa bontlha bongwe jwa motse bo santse bo aperetswe ke lenyora le legolo, mme a ikuela mo go mopalamente go leka go ba batlela tharabololo ya sennelaruri.

E ne ya re a tshwaela mo ngongoreng eo, mogolwane wa Water Utilities Corporation, Rre Modisaotsile Keetile, a supa fa e le boammaaruri gore motse oo o sa bone metsi sentle.

Rre Keetile o ne a itsise banni gore ka ntlha ya go bo motse wa bone o le kwa godingwana, bokete jwa metsi bo koafala fa a tshwanetse go palamela go fitlha kwa go bone mme seo se felele se baka tlhaelo.

A re seemo seo gape se nna gangwe le gape se bifisiwa ke kgaogo ya motlakase le tshenyego ya didirisiwa tsa kompone ya bone tse ba di dirisang go pompa metsi. Bokhutlo