14 Jan 2016

Banni ba Mmatshumo kwa kgaolong ya Boteti ba re ba batla go tlhomelwa madirelo a a tlhatswang metsi.

Ba boletse jalo kwa puthegong ya kgotla e e neng e biditswe ke mopalamente wa Boteti Botlhaba, Rre Sethomo Lelatisitswe bosheng. Banni ba re metsi a bone a letswai e bile a fetotse meno a bone.

Mongwe wa banni,  Rre Matshwenyego Baganetseng a re seemo sa metsi a bone se maswe, mo ebileng ba tlhophile lekoko le le latelang tona wa metsi kwa Gaborone.

Rre Baganetseng  o ne gape a ngongorega ka lekalana la CEDA, Gender Affairs le PPABD a re ditlamelo tsa one di kgakala le banni ba Boteti ka jaana di le kwa Palapye, Serowe le Gaborone a kopa gore di aname le dikgaolo.

O ne gape a re terata ya lephata la matlhoko a leruo e e laolang motsamao wa leruo e senyegile, e bile ga ba na mokenti.

Mme Bonang Tumedi a re ba kopa ntlo lehalaha mo motseng  wa bone le sekole sa go loga mo Boteti.

E rile fa a ntsha pego ya VDC, mothusa modulasetilo wa komiti ya ditlhabololo tsa motse (VDC) Rre Gabantshetse Boshoma a lebogela lenaneo la Ipelegeng a re ka lone ba kgona go dira mananeo a motse wa bone.

Rre Boshoma a re ba kopa go okelediwa dipalo tsa  babereki ba Ipelegeng  ka jaana palo e ba e filweng ya 105 e le nnye fela thata.

Mopalamente Lelatisitswe o ne a re  molelo wa kgolagano otla goroga kwa motse wa Mmatshumo kgweedi ya Motsheganong ele masome a mararo le bongwe (31st).

O bile a ba kgothatsa go ipaakanyetsa ipelelo  dingwaga tse di masome a matlhano lefatshe leno lentse le ipusa,ba dira jalo ka go apara mebala ya lefatshe la Botswana .

Rre Lelatisitswe o ele a ba gakola gore khamphani ya Botswana Telecommucation Limited BTCL e tla bo e rekisa diabe kgweedi eno le lesome le bonwe go tse Mopitlo a tlhola ga raro.

O ne a ba lemotsha botlhokwa jwa diabe a bo a ba rotloetsa go rekisa leruo gore ba reke diabe.

O ile a ba lekodisa ka Lenaneo la Economic Stimula Programme (ESP) le a reng ka lone puso e ikaelela go rudisa itsholelo.

Kgosi Keletshwaretse Phetsogang wa Mmatshumo o ne a supa fa ba tswentswe ke maduo a a wetseng tlase a ditlhatlhobo tsa lekwalo la bosupa la ngwaga o o fetileng. A re mo dingwageng tse di fetileng sekole se sebotlana sa Mmatshumo se ntse se dira sentle.

Kgosi o supile fa temo ya ditselana e ba baya ka fa mosing ka lebaka la tlhaelo ya digogi mme ba felele ba sa kgona go lema sentle.

Rre Phetsogang a re babega kgang ga ba bege dikgang tsa kgaolo ya Boteti ka fa go solofelwang ka teng. 

Badirelapuso ba ne ba araba dipotso tse di amang maphata a bone,fa mopalamente a ne a supa fa a tsaya tsie matshwenyego a bone e bile a tlaa a sala morago. Bokhutlo