28 Oct 2015

E re ka Lobatse a na le letlhoko la ditiro le le kwa godimo, monana mongwe ene o ne a iphataphatela ka a batla go ganetsa puo e e reng Lobatse ga a na botshelo. Tshiamo Eletsang wa dingwaga tse masome  mararo, o dira ditiro tse di farologaneng go itshetsa. 

O inaakantse le tsa boranyane le fa a sa tsena sekole, o lema merogo e bile ke motaki. 

Mo potsolotsong, Tshiamo o boletse fa a bone go tshwanela gore a seka a nna motlhopha ntsi mme a dire ditiro tsotlhe.  

Monana yo a re o remeletse thata mo go tsa boranyane. O kwala dikipara, o dira matshwao  a dikhamphani, o tsaya dinepe a bo a di ntlafatsa, gape o dira dikarata tsa itshupo.

O boletse fa a bereka le dikhamphani tse di ikemetseng ka nosi, dikgwebo tse di potlana le batho ka bongwe ka bongwe.

Tshiamo a re o  godile ele motho yo o ratang go dira ka diatla  ke ka moo gape  e leng motaki. A re o feletse  ka lokwalo la botlhano kwa sekolong, mme ka a ne a sa dira sentle a tshwanelwa ke go bona gore o itshedisa jang .

A re se se ne sa mo gwetlha gore a dire tiro  ya botaki. O boletse fa a tshwantsha e bile a dira le ka dipente. 

“Ke kgona go go tshwantsha, go tswa fela mo goreng moreki o batla eng. Gantsi bareki ba tla ka dinepe tsa bone ke bo ke ba tshwantsha kana dinepe fela tse ba di ratang ke bo ke di tshwantsha,” a bolela.

 Lerato la me la go tshwantsha le dira gore ke tlelwe ke tlhaloganyo ya go  kwala dikipara . 

“Lantlha ke ne ke kwala fela ka letsogo ke dirisa dipente jaanong e rile kgwebo ya me e ntse e gola ka reka motshine wa letsogo.”ga  bua Tshiamo.

A re ka botshelo bo lekwa ntlha tsotlhe o ne a ikopanya le ba nyeletso lehuma  mme ba mo thusa  ka go mo agela tshingwana ya merogo. Tshiamo o boletse fa ditiro tse tsotlhe a  di dira ka botswapelo ka a na le lorato mo go tsone.

O tsweletse ka gore  di na le mosola fela thata mo botshelong ja gagwe ka di a mo tshedisa  e bile di thusa le sone setshaba se a tshelang le sone. A re o  kwalela batho dikipara fa ba na le manyalo kana modiro ofe kana ofe fela, o ba direla le dikarata tsa taletso. 

A re se se dira gore a nne le bokopano le batho bale bantsi. O boletse fa a dirisana sentle le bareki ba gagwe.  A re o ba fa monyenyo ka dinako tsotlhe a bo a dira tiro ya bone ka nako.

A re sera sa motho ke nako, ka jalo kgwebo e tlhoka motho a ikiteile sehuba ka motho e le ene a iperekisang. Le fa go ntse jalo a re le ene o kopana le dikgwetlho di tshwana le letlhoko la madi go atolosa madirelo. Bokhutlo