22 Oct 2015

Morui wa monana  kwa Bobonong, Rre Dimpho Ntshwabi  yo o thusitsweng  ke ofisi ya banana ka P99 000 go simolodisa kgwebo ya thuo ya  dipodi o tlhalositse fa thuo ya dipodi e le bogadi  bo gaufi. 

Rre Ntshwabi  yo o dingwaga di masome a mabedi le boferabobedi, a re o simolotse  kgwebo ya gagwe e e bidiwang Ntshwabi Shoes Holdings  kgwedi ya Ngwanatsele  ngwaga o o fetileng ka dipodi  tse dinamagadi tsa Setswana di le masome a matlhano le boferabobedi le diphoko di le nne tsa mofuta wa boer goat.

Morui  yo, o tlhalositse fa e ne ya re morago ga dikgwedi tse pedi a sena go simolodisa  kgwebo e, dipodi tsa gagwe tsa tsala dipotsane di le lesome le boferabongwe . 

Rre Ntshwabi yo e leng sealogane sa dithuto tsa tsamaiso ya  bojanala go tswa  sekoleng   se segolo sa Limkokwing University, a re dipodi tsa gagwe o di rekisa di santse di le maroba ka makgolo a boferabobedi  podi e le nngwe.

A re kgwebo ya thuo ya dipodi  e tlhoka  boineelo le bopelotelele  ka dinako tsotlhe ka e na le dikgwetlho tse motho a tshwanetseng  go nna a di ipaakanyeditse ka dinako tsotlhe.

Rre Ntshwabi  a re dingwe tsa dipodi le dipotsane  tsa gagwe di ne tsa bolawa  ke serame ngwaga o o fetileng ka nako ya dipula  mme se sa fokotsa  palo ya tsone. 

 A re dipodi tsa gagwe ga di tshabelelwe ke go jewa ke dibatana ntswa a  ruetse mo lefatsheng la morafe ka a na le dintsa tse di disang e bile a nna  a itshwaragantse  le ba ofisi ya  matlhoko a leruo. Bokhutlo